■周庭昨日在「中箭」fb展示前日拍攝的一批「沙龍相」。一看，有晒角度構圖玩晒光線，仲執得靚靚，話唔係「宣傳照」都冇人信。 fb圖片影沙龍執到靚上埋網 呃完like閃人唔再到場
為了呃like，「中箭（香港眾志）」諸君的面皮可以去到幾厚？答案：無極限也！馬屎埔村有自稱「村民」者霸地，法院批出臨時禁制令也視為無物，阻撓土地的地主恒基收地。此前做鍵盤戰士號召支持者到場「聲援」、但人影都唔見的「中箭」諸君，在前日保安人員開始封場時終於「稍有進步」，就是派出副秘書長周庭等到場打卡，仲影晒沙龍相，驚死人唔知佢去過。想睇呢批靚相，昨日「中箭」facebook就有得睇，有晒角度tune晒色、連髮油都唔見埋。「勇武影相」任務完成，相已post，周庭昨日當然冇再去馬屎埔村啦。不少網民睇唔過眼，鬧周庭連做騷「抽水」都唔肯做足全套，「精神啲，臨時演員都係演員嚟！」 ■記者 鄭治祖
「中箭」諸君此前在fb貼文，叫人去「支援」霸地的「馬屎埔村村民」，但自己就人影都唔見，被鬧爆推人去死自己就「開房」食花生。汲取了教訓，「中箭」前日就派出周庭和另一名唔知乜水的「中箭」成員到場影相打卡。
雖云男女平等，但「中箭領導」羅三七（主席羅冠聰）及河童鋒（秘書長黃之鋒）自己都冇親身上陣，只係做鍵盤戰士發post轉帖，唔知係咪因為兩人「no gun」又學唔懂軍隊格鬥技，或者怕自己過街老鼠形象所累而俾人打多兩搥，又或者周庭有必殺技：掂吓都告你非禮，所以先推周庭上前線。
無論如何，周庭都叫做有去到現場，有默站但唔知有無唱「今天我」，點都好過羅三七及河童鋒兩條麻甩仔。
周庭前晚在其fb及「中箭」fb貼文，聲稱自己在場逗留近六小時，最後被保安抬離現場，更聲稱自己親見有保安以打火機嘗試焚燒村口一塊用作天幕之用的帆布，有保安更投擲對講機攻擊示威者。不過，所謂「冇片冇真相」，周庭前日有「專業攝影師」跟身，全程直播自己「勇武企喺度」，加上現場有大批專業記者，倘她所說的保安員「暴行」為真，點解冇片？
烈日當空下竟無髮油
其實，周庭此post的亮點並非那段凡字隔一隔的「作文」，而是「中箭」fb上載的近十張「沙龍相」，張張都攞晒角度，tune晒色，連周庭一直被人瘋狂恥笑的滿頭髮油，在前日烈日當空下竟然可以執到幾乎冇晒反光，批相仲要前日影，昨日先post，擺明要時間執到靚靚，肯肯定係「專業人士」的作品（雖然唔知係唔係用眾籌出糧）。
諷刺的是，馬屎埔村問題昨日未解決（見另稿），但周庭曬完呢輯靚相就潛水，擺到明只係做吸濕大笨象，更加令人肯肯定呢批相係用來當CV呃like呃支持。
影張射箭相自以為巧威威，結果成堆箭插返喺自己度。撐租霸本已不得人心，周庭仲要呃like，全身「中箭」可謂自己攞嚟。不少網民留言批評周庭搵人影相做show博宣傳，但就毫不「專業」，夠鐘收工就歸家涼冷氣，今日仲失埋蹤，真係無恥。
河童掛住曬like無落場
大家唔好唔記得周不時要宣傳吓自己、存在感低落嘅河童鋒。佢前日一直做鍵盤戰士，仲因抽「幸福醫藥」水被恥笑後老羞成怒，曬like數而惹來更多恥笑。
昨日，他終於出返街曬太陽，仲post埋自己在上環街市熟食中心食早餐的照片。網民就恥笑他自己號召人去「支援」馬屎埔村，但前日去完打卡就鬆，有網民隨即「更正」，話河童鋒前日掛住「曬命自己有幾十萬like」，由始至終根本無落過場。