香港文匯報訊（記者 娛樂組）今個6月足球狂熱席捲全球，香港足球迷都很忙碌，因為「美洲盃」和「歐國盃」都在舉行，當然名人、明星、網民都在談論。睇波自然喜歡一班人一齊睇，熱鬧熱鬧，加上邊睇比賽邊飲啤酒、吹水的確一樂也！各人有自己的心水，估勝負，來一輪牙骹戰，輸了請飲酒，輕鬆一下。雖然賭波已經合法化，但是睇波不一定要賭波，比賽是歐洲時間，香港人都要凌晨睇波，許多藝人都是只趁空檔睇波，沒有閒情賭波哩。
校長：法國隊最有冠軍相
識波之人譚詠麟自然全情投入睇波，譚校長覺得今年歐洲國家盃的隊伍多了，節奏亦會快些，會好看。他心目中法國隊最有冠軍相。
愛踢波的楊天經也非常期待：「歐洲國家盃四年一度，梗係一定會追睇，有幾隊我都鍾意，鍾意英格蘭隊係情意結，追開咁多年都係鍾意，另外意大利隊我都鍾意。今年特別的地方是參加隊伍加到廿四隊，其中包括未踢過歐國盃的新崛起球隊，所以今屆應該都幾好睇。」
睇波捱夜點算？「四年一次捱夜都值得，等開波期間我打算做運動或者睇戲，等開波再去睇，讓個人情緒會high起來先，唔會以眼瞓去迎接歐國盃。」
馬明：英格蘭後生搏命有機
馬國明（馬明）都是懂得踢波之人，人在深圳拍劇的馬明對歐國盃的賽事都很關心，他選擇支持英格蘭和德國隊：「首先英格蘭隊是情意結，感覺它今年多了好多後生仔，後生仔博上位，在比賽中應該比巨星更加搏命，有些機會。其次我選德國隊，我睇咗咁多年波，德國的整體戰水平唔錯，合作和分工都做得比較好。」
有些非踢波之人也被氣氛感染，例如身在加拿大的梁烈唯，被問到如何參與足球盛事，他表示自己不算足球狂迷，但都會睇歐國盃，否則同朋友沒話題，當然因為工作關係不可能每隊都捧場，他見到外界不少人睇好德國隊，好似好勁呀！
「歐國盃」有24隊波比賽，對少睇波的黃宗澤來講許多隊也不是太熟，但會支持英格蘭隊，他說：「只要有時間我都會睇比賽，男人約埋一班朋友睇波飲嘢好正常。要捱夜燥熱的時候，我會飲定羅漢果水解熱氣。」
不要以為得男人鍾意睇波，娛樂圈也有女仔會睇波，謝安琪和周秀娜都表示會睇首場開幕戰法國對羅馬尼亞，她們都睇好法國隊奪標。