戴耀廷話會承擔「佔領」行動嘅刑責，至今仲未找數，估唔到佢連如期重啟「特首民投」呢筆數都走埋。「特首民投」噚日喺facebook話要到聽日先至可以重啟。一眾無票喺手嘅反對派粉絲自然嬲嬲豬，叫「特首民投」索性摺埋；有人更突破盲腸，話系統點都會做到曾俊華跑出！
俾私隱公署省完一鑊之後，「特首民投」原本話可以喺噚日朝早10點重新收集提名，仲會用上以Telegram機械人程式設計嘅新系統，類似「雷動計劃」嗰陣嘅「雷動聲吶」咁。好嘞，到咗噚日，當一啲人喺「特首民投」網頁狂㩒F5之際，佢哋就喺facebook「耍冧」，話預計要到聽日中午12點先至可以重啟，原因係「新系統與原有資料庫連接的工作需時較預期長」喎。
「Sam Lung」一針見血話：「取消投票啦，浪費精力及時間。」「Eliza Yeung」就寸戴耀廷甩轆再甩轆，令到市民失去投票嘅意慾，「就算勉強完成，必定被眾參選人的支持者質疑公正性，不如算了吧。」「Kwong Raymond」更加直接：「算吧！結果一定係薯片（曾俊華），唔好設咁多不實際門檻，應承你都做唔到。」 ■記者 陳庭佳