■Winnie自稱踢爆「熱狗」內幕後，其fb兩度被強行登出。 fb截圖點解「熱狗」（「熱血公民」）嘅facebook內容，幾乎清一色都係《熱血時報》嘅嘢？原來可能係「內部指引」。網民Winnie日前喺《熱時》主持完最後一集節目，就打去近期一直狙擊「熱狗」嘅「神駒」仇思達節目度，宣佈退出「熱狗」，仲大爆「熱狗」「清算」同控制人嘅手段。佢話「熱狗」前頭目「狗達」黃洋達之妻「殘秀慧」（陳秀慧），其實先係藉小事點火頭嗰個，最終令到「狗主」黃毓民要同唔同人割席。第一個火頭就係去年立法會選舉結束後，「殘秀慧」借林浩基上節目而發難一事。佢仲話，而自己亦被「熱狗」要求同其他人割席，唔可以做其他節目不特止，仲唔可以喺facebook分享《熱時》以外嘅嘢，「好×邪教，令你交際網得返佢哋。」唔少益友都恭喜Winnie退「邪教」保平安，而「熱狗」方面就話俾人背叛「抹黑」，再次喺網上大派花生。 ■香港文匯報記者 甘瑜
原本係《熱時》節目《靈鏡MMR》主持嘅Winnie，日前打上神駒嘅網台節目，大爆自己想離開《熱時》嘅原因。Winnie話，自己上年10月已經想走，當時就係啱啱開始「清算」嘅時候，殘秀慧就借《米講時事》請咗「青年新政」狗頭軍師林浩基上節目一事發難，大興問罪之師。Winnie就話，其實個節目早就有林浩基，唔明點解殘秀慧要突然扮驚訝，??家諗返，當然知道係敗選後發作啦。
爆陳秀慧借林浩基發難
由於Winnie自己都有主持《米講時事》，當時佢亦都喺「熱狗」群內出帖澄清，「陳秀慧條八婆嘈完，引晒蛇蟲鼠蟻嚟嘈，最終毓民踢咗好多人出group（群組），因為唔知道係邊個點嘅火頭，但其實就是陳秀慧。」
佢仲話，之後有更多嘅火頭，其實都係陳秀慧點。而MR總監Marco Toscanini都打上去講返《米講時事》件事，仲話殘秀慧藉另一節目嘅請人問題發難，「最終就係叫人唔好交月費。」
只准分享《熱時》新聞
除咗點火頭亂狗主陣腳，Winnie話自己亦都俾黃洋達迫問，叫佢一係揀《熱時》，一係揀第二度，當時Winnie揀咗《熱時》，去同其他人割席。原本MR搵Winnie打算合作做全球粵語節目嘅聯網，「就俾佢哋拆爛（散）咗。」
佢仲話，「熱狗」會叫人唔好share MR嘅相關帖文，所以大家都只會share《熱時》嘅嘢，諗返轉頭，佢就用「好×邪教」去形容「熱狗」呢個組織。Winnie仲寸「熱狗」話︰「成日話人圍爐取暖，你哋??家越圍越細啦，你哋圍到去邊呢？」
佢仲踢爆「熱狗」嘅內鬥，指佢個節目嘅前身《奇奧小黑屋》個主持奇奧，其實就係俾殘秀慧爆佢穿櫃桶底，黃洋達就去搵Winnie接手，所以奇奧先冇得做。
派到一地花生殼，向來唔鍾意「熱狗」嘅「益友」當然熱烈慶祝Winnie脫離「邪教」，仲鬧爆「熱狗」極權、狗達同殘秀慧陰濕等。
「熱狗」方面就話自己係被背叛同「抹黑」。殘秀慧就喺fb出帖話︰「我唔會因為啲不知名ac（賬號）黎（嚟）搞我，我就同你地（哋）一樣不顧身份搲爛塊面謾罵的，過主啦。不斷騷擾我地（哋）網絡，騷擾我地（哋）系統，騷擾我地（哋）主持，造謠抹黑都出齊了，我還會提醒工作人員做好本份（分），做好手頭的事。外邊支持反對風風火火，被人成功掀起的仇恨，係傷害唔到多年面對政治臭坑訓練有素既（嘅）人既（嘅）。」
「Ben Lau」就恥笑道︰「未反攻前，『熱狗』周圍咬人，個勢幾強呀，而（𠵱）家俾人圍返轉頭即刻個個扮弱勢，以前睇佢地（哋）d（啲）comment（留言）係×返轉頭，而（??）家靜（淨）係識話人屈佢地（哋），自己係無辜既（嘅）。」