■梁頌恆去年被拍攝到遺棄示威者，自己搭的士鬆人。 資料圖片如果命運給予「青症雙邪」嘅「Cheap禎」（游蕙禎）同「的士梁」（梁頌恆）多一個機會，應該好多網民都會大叫唔好。事緣Cheap禎近日喺媒體放話，聲言如果唔使坐監或破產，會參加立法會補選，「收拾殘局」。好多網民都留言問「仲想嚟多次？」、「算×數啦」。「雙邪」仲預告，七一會有「神秘行動」，以乎想藉此去谷一谷人氣。不過，網民都係繼續力踩，仲問上次「叫人衝、自己鬆」、俾人影到搭的士走人嘅的士梁，今次係咪又想「表演坐的士」。
預告七一搞事谷人氣
「雙邪」舊年10月喺立法會嘅播「獨」辱華宣誓，最終走上被DQ（取消資格）之路。近日佢哋接受《蘋果日報》訪問，就大呻自己窮、冇工開，但依然「無悔」當日嘅行為喎。Cheap禎仲喺訪問中話，如果最終DQ審訊後唔使坐監或破產，自己會有意參加補選，去「收拾」「政府製造」嘅殘局。而的士梁就話，要睇吓支持者期望喇。
為咗參選呢，好多反對派政客都會突然親民，幫自己覺得係「白痴」嘅市民量吓血壓咁，再唔係就喺網上罵戰再罵戰。向來鍾意搞事嘅「雙邪」，就喺訪問中預告埋，自己喺七一會有行動，話要畀香港或國家主席習近平一個「訊息」喎。至於行動係咩呢？佢哋就話唔講啦，費事「見光死」，「做完，真係做到嘅話，大家咪知囉。」
「雙邪」以「有意補選」嘅恐怖核彈嚟嚇網民仲唔夠，仲話想喺七一有行動，網上反應當然好激烈。講到補選，網上幾乎留言都係話：「唔好啦啩？」
「Dee Elle」就直斥「雙邪」︰「成事不足，敗事有餘。」「Lun D. Chan」直言︰「選到佢地（哋）入去又唔宣誓咪搵黎（嚟）搞，算×數啦。」「Anita Wong」就話︰「已經辜負了選民一次，仲想嚟多次？補選冇人肯上去選就話叫殘局，大把人爭崩頭撲上去果（嗰）d（啲）叫肥缺。你咁都想撲埋一份，覺得自己值得選民再俾（畀）一次機會，呢d（啲）就叫厚臉皮了。」
專訪呻窮 回水無期
不過，最令大家耿耿於懷嘅，係「雙邪」冇正式成為立法會議員，但又袋咗立法會186萬元議員薪津，呢筆納稅人嘅錢至今依然冇回頭，但兩個人已經呻窮。「Fung Ming Chu」就叫佢哋︰「回水先講野（嘢）。」
至於佢哋嘅預告行動，唔少網民都已經預付劣評。唔少人都提返佢哋之前話圍中聯辦，但Cheap禎就只係換衫企喺示威者後面，的士梁口稱要保護示威者，但一見警員就跑得快到無影，更搭的士鬆人（見表）。
已經看破騙局嘅「香港本土力量」的何志光就話︰「奉勸大家，七一請避開『港獨』、『自決』、『人社』等組織。他們有『維穩費』收，有『政府照』，可以搞事博拉，從無坐監多過三個月（長毛2004當選後真係無一次坐監多過3個月）。我地（哋）係普通人，有案底隨時無工做，手停口停！你犧牲自己，班×街係唔會分『維穩費』俾（畀）你，你一世×街，佢地（哋）唔會可憐你，只會搵你影張相扮幫你呃『光環』！」 ■香港文匯報記者 甘瑜