■黃被姚松炎揶揄為「建制派最佳拍檔」。 fb截圖反對派成日挾民生議題同政府講數，又要講得兇狠，又要扮負責任，最終咪又係自己瀨嘢。立法會財務委員會前日過到36億元教育撥款等少數議程，除咗建制派一直全力支持，都仲要多謝民主黨黃碧雲（一嚿雲）及時回頭是岸，提出縮短反對派臨時動議嘅打鐘時間，先令教育撥款有時間通過。廣大市民同建制派當然欣慰，但今次「建功」嘅一嚿雲就似乎無法向激進派交代，連日前被DQ嘅姚松炎都出文揶揄佢同建制派係「最佳拍檔」。雖然佢講到自己係「急市民之所急」大仁大義咁款，但有網民直接踢爆︰「如果拉布根本唔係諗住拉散對家，咁即係做戲坤（昆）人民。」其實一嚿雲難得做返次好事，人生已經如此的艱難，有些事情就不要拆穿了。
一嚿雲前日搶在建制之前幫手剪布，令唔少反對派都大跌眼鏡，但佢似乎完全唔記得反對派台戲未完，前晚更主動喺facebook自爆早就為咗剪布一事同建制派通水，「眼見不夠時間通過所有37A臨時動議，我要求（財委會主席）陳健波找建制派議員提出動議，將5分鐘表決鐘縮減至1分鐘，但建制派竟然冇人肯提出，最後要由我出手。」
反對派網民：票債票償
有關講法當然瞬間被反對派網民鬧爆。「于潤生」就話︰「都唔使幫人助攻呀，骨氣都輸埋。」「ΥΝ Κωαη」就話︰「黃碧雲妳今日做左（咗）建制派，完全冇抗爭意志，竟然幫拖去通過其餘議案，下次選舉，我地（哋）要妳票債票償！」
有見群情洶湧，一嚿雲第二朝又出文話︰「36億教育撥款，過關不過關，千鈞一髮之間。好險呀！我做應做嘅事，於市民有益嘅教育撥款、興建醫院......要急市民之所急，笑罵任由人！」
咁樣當然又畀（俾）人鬧多鑊。「于潤生」繼續追擊︰「如果拉布根本唔係諗住拉散對家，咁即係做戲坤（昆）人民。」「Neil Law」就話︰「黃碧雲戲都懶做，趕住收工幫人助攻，之後仲要講到自己顧大局為撥款做咗正確決定，真係當正選民白痴！」「Ben Lau」就話︰「做議員做到笑罵由人？妳係代議仕（士），唔係問責局長。」
民主黨噚日亦都出post嘗試幫佢解圍，讚揚一嚿雲「果斷提出縮短打鐘時間」，如果唔係教育撥款嘅重要議題「可能無法通過」，但結果都變成吸嬲post，畀（俾）網民繼續鬧「民主黨賣香港」。
乳鴿「篤灰」有人「打龍通」
佢嘅黨友都出盡法寶，但明顯都唔知可以點兜。區諾軒話件事係「嚴重欠缺team work（團隊合作）的問題......但問題就是太多ego（自我）嘛」，似乎嬲緊其他拉布嘅激進派。袁海文就轉移視線話︰「我認為，因離港去了旅行，而沒有參與會議的議員，其實更值得被關注。」
羅健熙為咗澄清一嚿雲唔係聽陳健波命令而剪布，唔小心踩多佢一腳，踢爆一嚿雲早就同人打龍通，叫咗陳健波搵建制派剪布先。「Cheung German」都覺得咁樣嘅澄清令人「歎為觀止」︰「你這樣說情況不就更糟糕了？」
不過一嚿雲今次剪布點都好過拉布，有網民都全力支持（㗎）。「Law Fong King」就讚佢︰「你真係好偉大！參唔參加補選？我實投畀你。」「Dick Lau」就話︰「真係好險呀，好彩建制派仲有妳呢d（啲）對政府咁忠誠嘅議員咋！」「Jason Tam」就勉勵佢︰「不要怕，港豬永遠支持民主黨。」
有部分網民依然實事求是。「William Wong」就話︰「你班『犯（泛）民』做少陣小丑，大把時間傾方案啦！」「Jerry Lee」就踢爆佢講大話︰「我睇左（咗）playback（重播）事實係陳建波要求只點人數（舉手），但係『泛民』要求記名，所以要打鐘5分鐘，迫（逼）死後面議題。 依（𠵱）家你打篇咁既（嘅）野（嘢）？你地（哋）夜晚真係訓（瞓）得著（着）？」