■黃之鋒煽情寫文，冀街坊捐錢支持保住羅三七辦事處，但擺出嚟嘅圖片只有佢自己擔大旗。 黃之鋒fb截圖「香港中箭」（「香港眾志」）向來致力籌款同緊張議席就係人都知，但隨時隨地都植入到籌款廣告再幫自己宣傳「英雄形象」，真係連電視台廣告部都要跟佢哋學嘢。話說「中箭」主席羅三七（羅冠聰）早前俾法院DQ，屍骨都未寒，「中箭」秘書長河童（黃之鋒）已食住個勢上，話自己「想保住羅冠聰的南區辦事處」，貼多張圖都見唔到羅三七個樣，只有黃之鋒自己擔大旗，文末當然仲有同公眾「互動」嘅捐款呼籲。唔少網民都睇慣睇熟，留言話︰「重點：捐錢，課金，完。」 ■香港文匯報記者 甘瑜
黃之鋒一直恨議席恨到出面大家都見，早前向法庭就其刑事藐視法庭案求情時，都係話自己想參加立法會選舉，唔想留案底。隨着羅三七被DQ，同樣主力港島區嘅囥�顯意識到「機會嚟喇，飛雲！」近日又頻密發文出圖，宣傳下自己又叫大家捐錢。
議辦失資源難撐 畀link籌錢
佢上周四就喺facebook出文，話有街坊冇介懷羅三七被DQ，依然打去佢哋辦事處求助，然後話鋒一轉就話︰「說實話，失去議辦資源後，『眾志』的財政狀況不允許，我們仍用上萬元分別聘請社區幹事和營運地辦。所以，8月開始，到底辦事處能否撐下去，有沒人還可全職投入社區工作，我實在感到不樂觀。」最後再畫公仔畫出腸畀埋籌款link大家。
前日黃之鋒又再發文，話「我很想保住羅冠聰的南區辦事處，可以嗎......？」今次就醒咗少少，如數家珍咁話佢哋「翻看跟政府部門往來的信件、辦事處堆著（着）本應派發的單張，還有跟居民排解疑難的求助個案，為街坊爭取到成果而積存下來的剪報，實在依依不捨。」不過，確實做咗嘢嘅例子就得「剎停公屋商場改建國際學校」。之後先話「為著（着）8月的生計而憂心」、「如何負擔一個地區辦事處近萬元的租金」等等。
不過，話就話保住羅冠聰嘅辦事處，但羅三七明顯唔係重點，擺頭係黃之鋒自己擔大旗嘅相，擺埋辦事處職員嘅相，都唔見羅三七嘅樣。
網民寸「中箭」 「少外遊多衆籌」
唔少網民見證住「中箭」由一開始就話冇資源要籌款，行到今時今日都仲係話冇資源要籌款，第一反應已經係「又捐錢？」「Wong Si Si」直言︰「講咁×多廢話做乜吖，一開始就話想要錢咪得囉。」「Gary Lau」怒斥︰「講黎（嚟）講去都係捐獻比（畀）你哋花費同外遊正一無底深潭唔知係咪要養你班×街過世！」「Chan Ming Yin」就直接幫佢總結話︰「重點：捐錢，課金，完。」「Cathay Ho」就「響應」話可以保住個辦事處話︰「可以，閣下少D（啲）外遊，多D（啲）衆籌。」
另外，有唔少網民已經對「中箭」嘅煽情表達、「英雄形象」建構免疫，fb專頁「得罪講句」就回應返嗰個唔介意羅三七被DQ嘅街坊一事話︰「佢應該係唔知羅冠聰比（畀）人DQ左（咗）咋，你諗多左（咗）喇。」「Km Chan」就反問︰「市民就係投你要你幫，你就玩大左（咗），仲賴人DQ你。真係對唔對得（起）選你出黎（嚟）既（嘅）人呀？民主黨呢ｄ（啲）戲子，飯照食，舞照跳，損失十幾廿萬人工係咪真係好心痛呢？」
「Nathan Chung」就同佢哋計返工作報告話︰「不嫌（厭）其煩再提，議政者嘅責任唔只係發現問題，更重要係解決問題。煞停咗田灣國際學校之後，請問冇咗國際學校學位嘅學生點算？國際學校學位不足呢個赤裸裸嘅『民生』、你哋咁關注嘅『教育』需求，要點樣處理？市民投票、捐錢比（畀）你哋，係想你哋帶來轉變，唔係盲目反對建設、反對發展。請你哋理性啲做實事，不要濫用年輕人議政嘅光環。」