白鴿黨（民主黨）隻乳鴿吳思諾近排忽然彈出，無他嘅，因為補選將至，佢老竇又係已故立法局議員吳明欽，想唔俾班老叔父力捧都幾難！不過，佢近日接受報章訪問嗰陣，一時又話認同「青年新政」阿Cheap禎（游蕙禎）講「對當今政權要狠」，但俾人問點解揀返入「和理非非」嘅白鴿黨嗰陣，又寸返Cheap禎嘅做法搞到自己一夜間乜都無晒，睇完真係想講句「媽我好亂呀！」咁嘅質素，難怪有網民大嘆對佢完全無期望。
講返吳思諾個老竇吳明欽先，曾經係區議會、區域市政局同立法局「三料議員」，都算得上係一位好議員，所以當年人氣一度高企。不過，佢喺37歲、即係吳思諾3歲嗰陣就因病離開咗，之後李漢奸（李柱銘）同AV仁（何俊仁）一班世叔伯就睇住吳思諾大，李漢奸仲收佢做徒弟，佢仲可以入埋師父間房做訪問！所以話成功真係靠「父」幹。
認同Cheap禎 又寸返佢
雖然佢由立法會議員一嚿雲（黃碧雲）帶佢入黨啫，都唔使跟埋一齊魂遊太虛㗎？喺訪問入面，佢話近排睇返上年選舉論壇，當時Cheap禎提到「對當今政權要狠」，覺得Cheap禎個預言「中咗」。但當記者問返佢係咪因為咁所以揀咗民主黨時，佢承認??家政治上可以爭取嘅空間「確是有限」，但就話游蕙禎的做法會令所有嘢一夜間乜都無晒，而民生議題仲可以爭取，唔好因為政治而拖垮民生。
唔少網民睇完篇報道都俾佢搞到好亂，好似「Hoi Ming Wong」就質疑：「 民主黨也搞民生，民建聯也搞民生，為什麼我們要投給民主黨？」
「Sharon Chan」就稱，「民主黨唔做區齋掛banner，......等其他人做區做得7788，知道邊區有勝算，以『民主大佬』身份硬插支旗落嚟，唔會跟自己建議嘅協調機制，你唔讓位嘅下場。下場好似「青政」2015年咁，俾（畀）錢各大媒體話佢哋係鬼。」
「Mark Steve Leung」就似乎唔妥吳思諾呢種「世襲」做法，「政治世襲制，估唔到日本之外，也到香港了。」「Kenny Keung」更一針見血：「民主黨得個名有民主二（兩）個字，同菠蘿包無菠蘿一樣。」 ■香港文匯報記者 鄭治祖