■有網民回帶，區諾軒唔去支持「雙學三丑」，都要去黃毓民個台慶。fb圖片「而我不知道區諾軒是誰？」要知道呢位仁兄係咩人，其實唔難，只要查吓互聯網，就知道佢一直係個見縫插針，又要埋白鴿堆攞着數，又要同「獨派」把酒言歡，又話要溝通不同光譜，但剩係同「獨派」溝到好通，成日批評民主黨同中央溝通嘅人。
騎劫港視遊行博懵籌款
區諾軒第一次「響朶」，乃係佢仲係激進團體「左翼21」成員之時。當時，各反對派團體抗議政府唔發牌畀王維基揸旗嘅香港電視網絡，搞咗個大遊行。「左翼21」騎劫集會，搞到大家好無癮，區諾軒更被揭發在未獲同意下，私自用香港電視網絡員工的名義籌款。
香港電視網絡職工會即時表明並無發起或同意有關的籌款安排，「左翼21」也同區諾軒割席，話該組織沒有介入有關活動的「任何運作，包括籌款」。
區諾軒被踢爆後才死死氣地話會將捐款捐予樂施會。咁如果冇人踢爆，呢筆錢會去咗邊？咁就真係唔知啦！
他其後加入民主黨，更多次對該黨與中央溝通時大唱反調。如2015年8月，民主黨高層與國務院港澳辦副主任馮巍會面，區諾軒就聲稱「十分失望」，又形容是「不適當時候，做不適當的事」。
不過，對與中央溝通抗拒，佢同「港獨」分子就溝得好通。區諾軒被揭與曾經攻擊民主黨的激進「本土派」梁金成等人食飯飲酒，被人利用醜化「民陣」及民主黨，是政治低能、無知無能。事件一度引起網絡罵戰，其後漸歸沉寂。
「通敵」與「獨派」老友
其實，區諾軒見民主黨咁多「大佬」阻住佢上，點會唔想埋激進堆攞着數，尤其是「熱普城」在立法會選舉後反晒面，大把機會啦？今年佢就寧願去「狗主」黃毓民網台「MyRadio」（賣台）的台慶，仲同狗主、「獨」派嘅沙田區區議員陳國強、搞「光復」嘅梁金成等大合照，而唔出席當晚「雙學三丑」被改判監禁，各反對派頭頭都去荔枝角收押所「聲援」嘅活動。
工黨成員郭紹傑當時發難批評，其他反對派支持者也紛紛聲討佢同鼓吹暴力及族群仇恨嘅人咁友好，係想「食四方飯」。區諾軒當時就展現其深厚嘅「民主素養」，寸寸貢地回應質疑，金句包括「我好清楚自己做咩，認同咪認同，唔認同咪算。」「贈你兩個字：慳啲。」「廢話。」講唔過人，佢就話俾人狙擊，話人唔理解佢又要拎把刀迫佢跪玻璃咁話喎。
區諾軒到底係咩人呢？都唔使畫公仔畫出腸啦啩？ ■香港文匯報記者 羅旦