■黎敬瑋的「澄清」引發網絡罵戰。 fb截圖中西區區議會補選昨日開始接受提名，一句「寸爆」隨即令網戰先開打。獲反對派推薦出選東華選區的民主黨伍凱欣，在接受「香港獨立媒體」訪問時，被形容為「寸爆」對手、「中西區關注組」的羅雅寧。訪問時在場的民主黨創意媒體部部長黎敬瑋，就話伍凱欣當時「友善平和」，被形容「寸爆」令佢「摸不着頭腦」咁話。「獨媒」在回應時就話「寸爆」無正面或負面之意喎！鬧吓鬧吓，估唔到變成其他反對派支持者鬧民主黨成日大石砸死蟹，唔肯讓路畀其他人，令人作嘔咁話。
民主黨成員林子健此前被「傳真社」根據取得的閉路電視片段，質疑佢唔係「被擄走」，而係自行離開旺角，「傳真社」即刻俾民主黨支持者鬧餐死，話要斷佢財路，結果要道歉收場。唔知係咪想「案件重演」，伍凱欣大字標題被話「寸爆」對手的訪問一出街，黎敬瑋即發帖「澄清」。
辯稱友善平和批評
佢話，「獨媒」記者當時引述了羅雅玲對伍凱欣的批評，伍凱欣「無論態度語氣 ，就算記者感覺不是謙厚虛心，也必定是友善平和，因此其言談被冠以『串（寸）爆羅雅寧』，着實令人摸不着頭腦」，又暗指對方如此形容是有「政治目的」：「亦望社區工作以『講事實、比政績』為本，讓市民理性選擇。同路人之間亦不能因選舉而失義，最終令建制派漁人得利」云云。
「獨媒」編輯部成員黃俊邦就留言，話標題用「寸爆」是形容伍「自信」：「記者的感覺，亦無正面或負面之意......黃子華黃秋生都會寸爆人，反而寸人的人佔上風。」黎敬瑋就反駁道：「我真係不能接受寸爆係中性詞語，我讚人都唔會話 『你好寸』......」
民主黨的支持者就更為勞氣。「Ares Chan」狠批「獨媒」：「咁都要兜？我覺得你ON ×都係我個人感覺啦，你覺得有冇正面負面之意？」「Ken Lai」也指：「我話你『契弟』，只不過係想『關係親密啲』？」
已退出民主黨的區諾軒也做「炸両」。他首先伸脷（利益申報）話自己月捐支持「獨媒」，然後就將矛頭指向當反對派協調機制冇到，支持羅雅玲的「瀆誓四丑」中的姚松炎：「我所最為在意的事，還是沒有很多人關注。有無人諗過當區居民見到呢個局，點諗呢？機制並唔完善呀，係咪唔滿意，就無協調的責任呢？」
他又抽水稱，自己離開民主黨時說過，民主黨「要有第一大黨風範」，「唔好太在意他人批評」等等。
「Daniel Chan」就留言話，「佢地（哋）話因為伍凱欣選輸過所以唔可以再選，咁上屆好多『傘兵』都輸wo（喎），咁佢地（哋）係咪唔可以再選？」
「Ivan C. Y. Lo」則揶揄道：「街坊有做野（嘢）既（嘅）區，出選係天經地義，政黨一定要行埋一邊之餘，仲要唔該搭好個大台俾（畀）街坊表演。」
大石砸死蟹欠風範
不過，「Joe Leung」就狠批民主黨：「最可笑係仲講乜×『第一大黨風範』。民主派都就嚟死無葬身之地，仲分乜×大小。成日大石扎（砸）死蟹，最慘又無成績，又唔肯讓路，攝石人周圍痴（黐），真係令人作嘔。」 ■香港文匯報記者 羅旦