■傻根的言論被人反駁指講法未經證實。fb截圖上屆立法會會期尾聲，改革醫務委員會嘅《2016年醫生註冊（修訂）條例草案》慘被拉死，當時有激進分子仲扯到十萬八千里咁遠，聲稱如果增加業外委員，特區政府更容易降低海外醫生執業門檻，到時內地醫生就會來港「強摘器官」喎，之後仲有人發起拒捐器官行動。一直唔支持器官捐贈嘅「城邦派國師」傻根（陳云根），日前就引用外國網民嘅評論，話腦幹死亡嘅器官捐贈者做手術嗰陣，都仲會感到痛苦，叫班「信眾」無返觀世音菩薩咁嘅定力同慈悲，就唔好「不自量力」喎。不過即刻俾人反駁佢嘅講法未經證實，「心術不正」都不足以形容佢嘅低劣人格。講科學唔夠人講，傻根轉台講返政治，聲言當局搞緊「強制全民器官捐贈」，仲會同內地醫院共用器官，但呢啲都係佢幻覺嚟嘅啫！
傻根日前喺facebook轉載一個外國網民嘅評論，當中講到腦幹死亡只係為咗器官移植而做嘅診斷，當做手術嘅時候，腦幹死亡嘅捐贈者會被注射各種藥物，以維持維生狀態、確保器官功效，但就唔包括麻醉藥，而喺切割器官期間，捐贈者會因感到痛苦而心跳、呼吸加速。佢仲溫馨提示班「信眾」，叫佢哋除非有觀世音菩薩咁高深嘅禪定力、咁無量嘅慈悲心，就唔好「不自量力」去做所謂嘅死後器官捐贈，而佢自問就無咁嘅能力嘞。
網民踢爆講法「未證實」
網民「Kayue」就叫大家唔好聽傻根講，話腦幹死亡已經被廣泛接受為死亡嘅一種，如果腦幹死亡就唔會有痛覺，亦都無法自主呼吸，而傻根轉載嘅評論最初來自一個陰謀論專頁，呢個講法已經俾fact check（事實查證）網站判定為「未證實」，網站明確指出「沒有證據顯示臨床死亡、腦死亡或經驗心臟死亡的器官捐贈者，能在器官捐贈過程中感到痛楚」。
研究開天體物理學嘅科學專欄作家余海峯，分享「Kayue」嘅帖文時，就話用「心術不正」都不足以形容傻根嘅低劣人格，仲提到3年前已經俾佢block（封鎖）咗唔畀睇佢fb，「當時佢話九龍暴雨香港天晴係『天降異象』，我指出呢啲叫『局部地區有驟雨』，佢就話我『科學干預宗教』，跟手block埋我。」
雖然余海峯聲明「只談操守不談政治」，但係前排佢上過網媒《謎米香港》做嘉賓，而《謎米》一向黐開「人民力量」，「佔領」嗰陣仲篤過當時仲係「熱狗」嘅「法國佬」張珈衍出嚟，佢同「熱狗」有無私怨就唔知嘞。
到咗噚日，傻根喺fb反擊，話又有佢啲haters（仇家）用所謂科學觀點鬧佢，但係佢篇嘢係用「佛法觀點」寫嘅，只係引述一啲醫生嘅論證做旁證，寸啲haters係白癡、唔識閱讀。
「用佛法講醫學係咩玩法」
「Kayue」窒返傻根轉頭，話如果傻根識閱讀，就知道成篇文無批評過佢嘅「佛法觀點」，「唔係關乎人命邊得閒理你。」余海峯就寸傻根「用佛法觀點講醫學係咩玩法」，又自嘲會被「皇天擊殺」，「已經親身去過紐倫堡揀（墓）位。」
屈立法強制全民器捐
傻根又拉埋內地嚟講，聲稱當局「正密謀立法強制全民器官捐贈」，並會同內地醫院器官共用，「只是皇天有眼，他們上次的換肝手術搞到災難收場（大家仍記得新聞吧）。港共要建立的，是珠三角區域的『器官共享計劃』，更大的災難仍會來，立心不良者，等着瞧。」睇嚟吤峏v教、科學等原因反對器官捐贈都係廢話，一句講晒政治行先。■香港文匯報記者 陳庭佳
