林 作
好一陣子之前曾經被外國升學公司邀請，出席過好幾個外國升學講座。出席嘅家長都好熱情，好踴躍地發問。本來是一件好事，只不過有部分問題實在令我有少少無語。
家長一定會關心自己嘅子女，明嘅，而且仲要一個人去到一個好遙遠嘅國家讀書，會擔心都是人之常情，只不過如果連「冬天會唔會凍到要着羽絨」，「病咗應該去邊搵醫生」這些雞毛蒜皮嘅小事都要擔心就未免有點過分。送子女去外國其中一個原因是想他們學會獨立，但如果反而事事都要擔心甚至事前打點一切豈不是本末倒置？
近期嘅其中一個網絡熱話，就是討論香港嘅怪獸或者直升機家長現象。一位網民在討論區指，曾有一位中學生的家長致電稱因為行雷，拒絕讓子女來面試。甚至有家長仍然常常接送十八歲正讀大學的兒子，下雨時仍會送遮及雨衣到校，甚至幫兒子邀約心儀女生。如此行徑，有可能會令子女在朋輩之間覺得十分尷尬，印象分大減。
老實講，其實我覺得教導最好嘅方法就是Let go。以我為例，初中嘅時候自己一個過了英國讀書，人生路不熟，又無熟悉嘅朋友，開頭真係十分辛苦。
但人係一種適應性好強嘅生物，乜嘢認路洗碗鋪床執嘢同外國人打交道等等，做做下就自然會慣，變為本能。與其保護自己嘅小朋友，不如趁他們仲細嗰陣俾他們出去闖下，甚至去撞下板。有好多嘢不是自己經歷過是不會學識，不是自己犯過錯是不會警惕。
年紀小犯錯，起碼其他人會因此而對你寬容，亦可以鍛煉自己嘅承受能力。一個在挫折同埋失敗中成長嘅人長大絕對會係一個心智堅定的人--我每日都失敗，仲點會驚，但一個從小到大都順風順水嘅人突然遭逢挫折就好可能會一蹶不振。
好多時候，過分保護不一定是好事，在大自然中老鷹亦會將小鷹推下懸崖去令自己的後代學會飛行。Let Go，才是令自己嘅孩子長大的方法。