林 作
大消息，我正式俾一個大老闆包起咗......當然係講緊笑。老闆就真係有嘅，只不過係同我正式簽約，令我正式成為藝人嘅一員。
從牛津到大律師，再去到補習老師（唔係咩天王）以及藝人，背後嘅原因以及心路歷程大概可以寫滿幾頁紙，但係今日就唔講咁多廢話，只係想簡單咁分享一下我呢個咁有趣嘅經歷。
話說好幾個月前，我一個好兄弟嘅英國留學教育中心需要拍一個宣傳廣告，咁我梗係義不容辭去幫忙。而呢種廣告內容對白其實都相對上十分自由，所以容許我喺裡面進行一些即興嘅對白及表演。好彩地，呢個廣告放咗上社交媒體之後竟然得到了不少回響及注意，包括我𠵱家嘅大老闆在內。因為老闆一直想搵一個年輕些嘅笑星，所以就搵咗范振鋒大哥去考察一下我。
演藝其實一直都係我其中一項好感興趣嘅項目，尤其係搞笑方面，只不過受我嘅硬件所限（講直啲就係人又矮又唔夠靚仔），行內又無強勁嘅Connection（聯繫），所以一直都無咩機會發展。不過我一直都無放棄呢方面嘅想法，得閒時就會同我志同道合嘅朋友去炮製一些搞笑短片，好似我嘅「Chok墨」系列咁，可能係想得到其他人嘅認同，又或者係滿足下自己一直以來嘅表演欲。但點都好，可能范大哥就喺我嘅作品入面見到我有Potential（潛力），所以老闆最後決定簽咗我。
講咁多，其實主要都係兩隻字--「追夢」。最近見到關於一個女生嘅報道，佢嘅志願係全職Cosplayer，但係因為出外表演比賽同埋買服裝都需要好多錢，所以喺出Show嘅空窗期時都會打下散工。有啲老闆話吽u唔知自己嘅目標係咩所以係咁轉工」，但佢嘅回答「就係因為我知道我想要咩所以先不停轉工」，我勁Buy。邊個話人嘅目標一定係打死一份工。所以，我想對呢位Coser，甚至所有努力緊去追尋夢想嘅年輕人講，今日我係幸運嘅一個，但係我相信只要大家努力，終有一日屬於你哋嘅幸運都會來臨。