梁振輝 香港資深出版人
有二人在WhatsApp
婷婷：出得嚟行......
輝仔：係咪想講「遲早要還」呀？
婷婷：「還」就梗係唔在講喇！啊，我諗到嚹！我想講嘅係「出得嚟行，牙齒當金洗」！
輝仔：咦，金句嚟喎！不過，洗-->使！
婷婷：係喎，唔係「洗牙」噃！
輝仔：其實你「洗得牙」都啱㗎嘞！
婷婷：噏乜呀？
輝仔：人哋就洗乾淨個八月十五坐監，你就洗乾淨棚牙等人「落1」囉！
婷婷：你咁講係咩意思先？
輝仔：問心啦！你成日講嘢「唔算數」、「下巴輕輕2」、「誓願當食生菜」，就算棚牙冇畀人「落」，你講大話都會甩大牙喇！
婷婷：有冇咁衰呀，至多都係「貪爽口」啫！
輝仔：「爽口」，食雲吞麵咩？係「貪口爽」呀！
婷婷：咪勞嘈，總之第日就「一言九頂3」係啦！
輝仔：「頂」你個頭，唔係「頂嘴」個「頂」，係阿爺廚神「鼎爺」個「鼎」呀！
婷婷：你啲粵語都好得啫，真心想跟你學下嘢！
輝仔：好，聽住先喇！
廣東人喜吃「爽口」東西，即咬下「彈牙」，有不太硬也不太軟的感覺。然而，「爽口」不同「口爽」，廣東人指的「貪口爽」，亦作「口爽爽」，是順口說，未經大腦而說出的話語。
示例：A君與B君是某茶餐廳的常客，二人不算相熟，相遇時雙方也有點頭。A君對人頗熱情，不過就偶爾「貪口爽」。話說某天在茶餐廳內，A君見B君與二人卡位對坐的女士說得投契，她趨前問道：「這是你太太嗎？」B君一臉尷尬。原來那位女士只是茶客，當時正與B君研究往元朗的交通路線。
「牙齒當金使」中的「使」是「使用」的「使」，文讀「史」、白讀「洗/駛」；應是這個緣故，人們很多時會誤寫成「牙齒當金洗」或「牙齒當金駛」。以下的處境同出一轍：
在「不用」的語境下，我們應寫「唔使」；可有人不分就裡，一律用上「唔使」，就有可能出錯。以下的個案已充分地說明了這一點：
A：呢張十蚊紙污糟成咁，「唔使」得㗎！
B：放啲衫褲落洗衣機之前，我周時唔記得喺個袋度攞返啲銀紙出嚟，洗完咪冇事，仲乾淨咗㖭！邊個話「唔洗」得？
A：我係話「唔使用」得，唔係「唔清洗」得！
╳╳╳
交通警：先生，呢度係禁區，唔該攞個牌嚟。
車主：運輸局局長同我老豆係「老死4」，師兄畀下面好喎！
交通警：老老實實唔好話識得，就算你老豆係運輸局局長，甚至係特首，都唔可以泊架車喺度嘅！
車主：畀次機會都得卦！
交通警：嗱，唔好話我唔提你，再「唔駛」開就會抄多張㗎嚹！
車主：「唔使」執到咁正呀？
交通警：我都係執行職務啫！
「牙齒當金使」中，「牙齒」指「口齒」，比喻承諾；「當金使」指使用時相當於金。那：
牙齒當金使
【A promise is worth as much as gold.】
就如同「一諾千金」了。
「生菜」這種菜蔬因質地脆嫩，適宜生食，且「易吃」（易於咀嚼）；「吃生菜」比喻易為之事。「誓願」指立誓發願，以示決心；此行為嚴謹性高，不會隨便為之。那：
誓願當食生菜
【Taking oaths in a carefree manner.】
就是將發誓看成隨便事--承諾隨便開出，到最後「走數」多過食飯。換言之，開的盡是「空頭支票」，承諾是不會兌現的。
為保不失承諾，我們就不隨便許下承諾，即承諾前要清楚分析主觀條件和客觀形勢。然而，如個人經歷告訴了你自身有一定實力，那就不怕大膽地作出承諾，只要及後勉力為之，到最後就算因種種原因而非藉口，承諾未能圓滿履行，相信是可獲人家理解和接受的。
________________
1、「落」，粵方言用字，讀「落6-1/lok1」，本字可能是「剝/mok1」。「落咗某人棚牙」指打掉某人那副牙齒，比喻指挫某人的銳氣。
2、「巴」讀「爬」，「輕」讀「heng1」；其俗寫是「下爬輕輕」、「下扒輕輕」。
3、「一言九頂」係由「一言九鼎」演化過來。後者指一句話兒抵得上九個鼎的重量，比喻說話堅實、所言非虛；前者指有人「發一言」，某人「頂九句」，形容某人諸多辯駁。
4、「老死」指很要好的朋友。
【專欄簡體版】https://leoleung2016.wordpress.com/