梁振輝 香港資深出版人
放學途中，婷婷和輝仔行經一草叢。
輝仔：咦，婷婷，你「踩住1」啲乜嘢呀？
婷婷：下，蛇呀！
說時遲，那時快，婷婷被嚇得從地面彈了起來。
輝仔：使唔使驚成咁呀？你睇真啲係乜！
婷婷：下，乜原來係條繩嚟咋！
輝仔：廣東人咪叫呢啲做「踩住芋莢當蛇」囉！你睇我幾咁鎮定，仲「定過抬油2」㖭！
婷婷：你冇畀蛇咬過，梗係唔知驚喇！
輝仔：乜你畀蛇咬過咩？
婷婷：七歲嗰陣，阿爺帶我返鄉下。有日我喺後園度玩，唔知邊度走條蛇出嚟咬咗我大髀一啖，之後又紅又腫，痛咗成幾個禮拜，好彩條蛇冇毒，而家諗起都怕怕，講落都有啲「腳仔軟3」！
輝仔：全中國人咪叫呢啲做「一朝被蛇咬，三年怕草繩」囉！
婷婷：我諗就算我唔驚成世，都至少驚十年！
輝仔：行快兩步啦，天就嚟黑齊嚹！
說時遲，那時快，天色已昏暗。
婷婷（突然停下來）：輝仔，你擰個頭睇下，背後有啲乜嘢？
輝仔：婷婷，唔好話我知係「嗰等嘢4」下，我唔嚇得㗎，「講小5」搵第樣！
婷婷：玩你咋！正話你咪「巧6」威嘅，點解而家又驚成咁嘅衰樣呀？對比好強烈喎！
輝仔：你有所不知，細個嗰陣，阿哥夾埋隔篱班細路，一入黑就扮鬼嚇我，所以我咪......
婷婷：哦，所以你咪有童年陰影囉！
輝仔：所以我咪一入黑就疑神疑鬼囉！
婷婷：廣東人咪叫呢啲做「見過鬼都怕黑」囉！
輝仔：都形容得幾貼切噃，畀你叻番次喇！
婷婷：仲講，行喇，又話驚！
「芋莢」，又稱「芋莖」，廣東人多叫「芋梗」；「莢7」，文讀「gaap3/甲」、白讀「haap3/狹6-3」；「梗」，文讀「gang2/耿」、白讀「gwaang2」。乾了的「芋莢」像蛇。人們從認知得悉被蛇咬到可能會致命，因而對蛇產生了恐懼。有人就因踩上「芋莢」而懷疑自己踩着「蛇」，繼而害怕驚懼。以下廣東俗語描述了這個情況：
踩到芋莢當蛇/踩着芋莢當蛇
比喻因疑心而害怕。此俗語有另一個寫法：
踹到芋莢當蛇/踹着芋莢當蛇
當中的「踹」，與「踩」意近，可讀作「踩/caai2」，多讀作「jaai2」。
上述情況只是曾聽聞或目睹，不是親身經歷。有人曾被蛇咬，因而在碰上類似的物體而害怕驚懼。以下一些中西諺描述了這個情況：
一朝被蛇咬，三年怕草繩
一朝被蛇咬，三年怕井繩
一朝被蛇咬，十年怕草繩
一遭被蛇咬，十年怕井繩
一日被蜂叮，三年怕蒼蠅
Once bitten, twice shy.【一次被咬，下次慌張】
A burnt child dreads the fire.
【曾被火灼傷的小孩怕火】
三年、十年只是虛數，喻以後。這些諺語比喻在某件事情上吃過苦頭，受騙或遭遇傷害後，以後一碰到類似的事情就害怕。話說回來，諺語是民間廣泛流傳的話語，故不同成語，規範性較少，所以經常出現多個版本。與這些諺語意近的廣東俗語還有：
見過鬼都怕黑
傳說鬼在夜間出沒。聲稱曾經見過鬼的人在夜間總會害怕。
示例：
上次佢話有急事借咗我五千蚊，而家仲未還；今日又話有急事，想問我借多三千蚊；今次打死我都唔會借畀佢，「見過鬼都怕黑」喇！
以上示例，最後一句有另一個表達形式--「見過鬼都仲唔怕黑」咩！現實生活中，真的有人：
見過鬼都仲唔怕黑（見過鬼還是不怕黑）
皆因：
好了瘡疤忘了痛/好了傷疤忘了痛
比喻在情況好轉後便忘卻了過去所受的苦或失敗的教訓。
_______________________
1、「踩住」本是「踩着」，「着」讀時音變成「住」。
2、抬着油缸時要保持高度平衡及格外小心，一不穩定就會打瀉油。「定過抬油」借喻異常鎮定。
3、「腳仔軟」是因受驚而站不穩的諧趣講法。
4、「嗰等嘢」的意思是那等（種）東西--「鬼」。有此說法是因為人們害怕鬼而不敢直呼鬼。「等」這裡讀「亭4-2」。
5、「講小」應為「講笑」，「笑」讀時變調而已。
6、「巧」，是「好」的普通話讀音的近音，也是香港人揶揄內地人講廣東話的產品之一。
7、筆者不接受「呷」作為「莢」的俗寫--「芋莢」是專有名詞，因而不能以同音字來取代。
【專欄簡體版】https://leoleung2016.wordpress.com/