梁振輝 香港資深出版人
劇場3：
2017年某天於某地鐵站出口側；主角是一對80後的男女。
女：你都得㗎嚹，我生日你竟然送個「A貨1」LV畀我，等我喺班fan（friend）面前出醜，你真係「打得少2」嘞！
男：婷婷，我冇心㗎，只不過去買嗰陣，個sales（營業員）話嗰個型號冇貨，咁咪買住個A貨「頂檔3」囉，我有諗過之後買番個「堅4」嘅畀你㗎！
女（邊說邊動手）：咁嘅「屎橋5」都畀你諗到，唔「摑6」醒你都對唔住祖宗十八代喇！
男（狀甚痛苦）：唔好打喇，我以後都唔敢㗎嚹！
女方並無理會，繼續左一個巴掌右一個巴掌。女方的激烈行為引起了路人圍觀，當中不少口講指畫、竊竊私語。
路人1：嘩嘩嘩，巴巴到肉，係咪拍戲呀？
路人2：舊年咪話有個「港女7」喺街度冚咗個男朋友14巴嘅，數落今次好似唔止噃！
路人1：咁咪上埋「健力士世界大全」囉！
路人3：畀女人一巴一巴咁冚過嚟，都可以唔反抗，仲係男人嚟嘅！
路人4：個男人梗係做咗啲對唔住個女人嘅嘢，先至唔敢反抗喇！
路人3：咁就抵佢死嚹，打得好！
路人4：總之，香港地，「寧得罪小人，莫得罪港女」！
有一中年男士「抵唔住頸8」，趨前問個究竟。
路人5：小姐，「邊個唔啱，邊個唔着9」，都唔應該當街當巷郁手郁腳㗎！
女：想「做炸兩」呀，信唔信我摑埋你吖嗱！
路人6（大叫）：報警喇？
男：大叔，行開你就「襟撈10」啲！
路人5：唔好意思，咁我幫唔到你嘞！
除了「做架兩」和「做架樑」的講法，年輕一代對「那種」行為多會說成「做炸兩」（「兩」讀「亮6-5」）。然而，他們對「炸兩」這款香港美食為何與「那種」行為拉上關係卻大惑不解。還不只，香港人自少吃「炸兩」，竟大多對其名稱的由來一無所知，那筆者就在此順帶交代一下。
「油炸鬼」又叫「炸麵」，北方人多叫「油條」。把油條一分為二，用（豬）腸粉裹着，便做成一款叫「炸腸」的食品。有人以為「炸兩」的分量就是「兩」條炸腸，其實不然。
原來除了「炸兩」，還有「炸一」和「炸二」這兩款炸腸，區別在於：「炸一」有「一條」炸腸，「炸二」有「兩條」，「炸兩」則有「條半」。其實「炸兩」的出現，多少與價錢和個人胃口有關：
「炸一」，「到喉唔到肺11」
「炸二」，又驚食到「滯12」
「炸兩」，剛好兼「實惠13」
為免名稱上的混淆在銷售時引起爭議，現時幾乎所有店舖，只售賣「炸兩」這款炸腸了。
其實，「炸兩」與「那種」行為拉不上任何關係。說的人有兩種，一種是故意把「架兩」諧音化成「炸兩」；另一種則因道聽塗說，以為「那種」行為是「做炸兩」。
綜觀各劇場中「做架兩」的人，其行為涉及有人「『駕』馭某『兩』人」的事，尤指爭執。據此，筆者認為正寫是「做駕兩」。「架」古同「駕」，筆劃又少些，那就用「做架兩」作為標準寫法好了。
「做架兩」的行為接近做替人出頭、勸架、調解爭端的「和事佬/和事老」，帶有「路見不平，拔刀相助」的率性豪情，可當事人大多不領情，以致擺平事件的成功率低、收場慘淡的機會率高，對那些「有心人」來說實屬無奈。
______________________
1、「A貨」指優質假貨。
2、「打得少」指「抵打」（該打）。
3、「頂檔」指臨時充當；「檔」的本字是「當」。
4、「堅」是香港人用以形容真確的單詞。
5、「屎橋」，同「死橋」，指差勁、毫無建設性的主意；「橋」讀「橋4-2」。
6、「摑」，讀「gwaak3」，而非「國/gwok3」；指用手掌拍打，廣東人多指打臉。
7、「港女」是對偏激、傲慢的香港女性的貶稱。
8、「抵唔住頸」指因不值某人所為而出言干涉。
9、人們對「邊個唔啱，邊個唔着」，大都理解成「誰錯誰對/誰對誰錯」。由於「唔啱」就是不對，即是「錯」，那又是否表示「唔着」就是「對」呢？其實不然，「唔着」指「不着」，有不適宜、不恰當、不合理的意思。凡事並非「非對即錯」，因此用「唔着」這個字眼比用「錯」為恰當。由於有了「着」等同「錯」的誤解，人們在「誰錯誰對」的情況下也會說：
邊個啱，邊個着（原意是誰對誰合理）
邊個着，邊個唔着（原意是誰合理誰不合理）
10、「襟撈」原指長時期有工做。比喻指懂看形勢。「襟」的本字是「禁」，讀「擒3-1」，解耐久，如：個杯好禁用；而家啲錢唔禁使。
11、「到喉唔到肺」指分量過少而未感滿足。與「唔夠喉」義近，如：得半粒鐘打機，到喉唔到肺！
12、過飽就有「滯」的感覺。
13、「實惠」這裡指因分量少了而經濟了。
【專欄簡體版】https://leoleung2016.wordpress.com/