■譚文豪又試圖抹黑高鐵，但被不少人打臉。 fb截圖反對派大搞反「一地兩檢」示威，但次次都門可羅雀，除咗因為撐嘅人佔主流外，同佢哋連自己講緊咩都唔清唔楚，叫人點撐？公民黨立法會議員譚文豪為咗反高鐵，翻來覆去話廣深港高鐵嘅廣州南站喺「番禺」，去廣州市中心好轉折，嚟「證明」高鐵冇用喎！不過，佢呢啲咁嘅講法，連自稱反高鐵嘅反對派支持者都睇唔過眼，話喺廣州南站坐高鐵可以直通全國18省主要城市，唔該佢查查資料先講，唔好咁白痴。
運輸及房屋局局長陳帆前日公佈咗廣深港高鐵預計收費，譚文豪又出嚟抽水，喺fb製圖再次話高鐵嘅廣州南站喺番禺，又話去埋啲「鄉郊」都收貴過直通車唔抵喎，「明明你想去銅鑼灣Sogo，送咗你去大球場不特止，仲收貴你$40，架車點快點舒服都無用啦！搵笨咩！」
網民「Vladimir Chung」就留言反駁：「廣州南好明顯只是連接全國高鐵網的接口，即係好似長途機中途係香港轉機差唔多的意思，真係越黎（嚟）越唔明佢地（哋）諗乜。高鐵如果真係可以42分鐘到廣州南然後短時間內可以轉到車去貴州/重慶其實係好方便。」
「Beck Man」揶揄道：「你楂（揸）飛機咪一樣，明明個牌寫住飛去『台北』，你就飛左（咗）我去桃園。仲要轉半個鐘捷運先到台北市。點解又唔見你爭取下直飛台北松山？」「CCurtis Lai」也道：「其實明明番禺都係廣州市既（嘅）一部分，冇呃人ga（㗎） wor（喎），好似d（啲）人坐飛機黎（嚟）到機場，跟住係（喺）度鬧赤臘（鱲）角根本唔係香港（島），所以係呃人咁。」
廣州南將通18省市
自稱支持反對派嘅網民「HoMan Li」都睇唔過眼：「政府高鐵段宣傳片以廣州（南）站為重點，網民們甚至議員們就一窩蜂咁去格價格時間指責高鐵效能低、貴、又話廣州南喺番禹（禺）什麼什麼......其實（譚文豪）圖中個問題同『機場喺啟德咁方便點解要搬去大嶼山』一樣咁白痴，舊機場負荷太大市中心又冇位擴建咪要喺市郊新區起囉，重大既（嘅）交通基建設備對開發新區/新市鎮有咩幫助自己上網搵資料啦。」
他續稱，規劃中「廣州南站」係中國高鐵網華南地區最重要嘅樞紐站，亦係現在全國停車數同客流量最勁嘅站。「依（𠵱）家廣州南共有15個站台28條線，5條主要高鐵線京廣、廣深港、貴廣、南廣和廣珠線總站，連同其他交匯線，喺廣州南站坐高鐵可以直通全國18省主要城市。」
「HoMan Li」話：「廣深港段高鐵既（嘅）主要目的，就係將香港，經廣州南站連入全國高鐵網，當人哋講緊全國，甚至連接西伯利亞鐵路既（嘅）時候，你哋仲停留喺『直通巴$110就來回廣州』『比直通收貴左（咗）$40』......我唔係話叫大家唔好反對高鐵，但立論可唔可以俾（畀）大啲啲既（嘅）眼界，搵多少少資料，睇清楚啲個問題核心先講呢 ......」
曾經以打倒前立法會議員黃毓民為「使命」嘅fb專頁「芒向報」亦發帖：「去廣州東站的人不會搭高鐵，但去番禺的人會搭高鐵，咁又有咩好拗？有人坐飛機去上海虹橋，但亦有人搭去上海浦東，百貨應百客，冇所謂的！」
帖文仲揶揄：「阿譚議員會唔會叫自己任職間公司停飛其中一條航線呢？廣州南站地區發展定位為：泛珠CBD、泛珠合作平台、華南樞紐門戶、綜合商貿新區。又點會冇人去呢？」 ■香港文匯報記者 羅旦