反對派個所謂「初選」搞到變成政治炸彈，一個二個就諗緊點樣將個炸彈轉手。繼「自決派」朱凱廸日前突然改口話自己向來支持遞補機制，但又爆咗主辦機構「民主動力」一早就開過會講Plan D之後，「民動」噚日就詳細「交代」，卸責係姚松炎講多咗，先令佢哋要講話個機制唔係「鐵板一塊」去包底喎，再轉身射個三分波將炸彈交到民主黨Plan C袁（袁海文）身上，等佢決定係咪要參選咁話。接咗波嘅民主黨好快又畀人話係有私心地逼走民協老馮（馮檢基）。有老馮支持者話，既然原來個個都支持原本個機制，咁不如老馮收回成命做返Plan B啦，問你死未。
個所謂「初選」嘅遞補機制引起反對派陣營鬼打鬼，「民動」召集人趙家賢噚日就好有技巧地對住記者加埋喺facebook度示範如何唔上身地揹飛。趙家賢話，一開始唔講清楚呢，因為未獲授權，唔想影響公正性；至於佢之前點解要講個機制唔係「鐵板一塊」呢，就係因為姚松炎講多咗在先，佢再去幫手「包底」；咁個「初選備忘錄」嘅條文點理解呢，其實「可根據」就唔等於「必須根據」，唔係DQ而係自行棄選呢，亦都唔喺保險範疇入面㗎；點解要再傾過呢，就係因為有啲人，其實即係姚松炎一直都冇參加過機制嘅制定，所以作為一個勝出者想傾吓邊個喺自己出事係繼任，係好合情合理嘅；咁到底𠵱家係點呢，就係等Plan C袁方面自己諗清楚要唔要出選囉，總之「民動」支持遞補機制㗎。
稱是誤會 完全唔上身
雖然真係講到完全唔上身，令人幾乎唔記得「民動」係主辦機構，但反對派陣營𠵱家根本就係集體搵緊替死鬼，「Fai Ho」就即刻留言，話趙家賢個「不是鐵板一塊」論，令朱凱廸誤會咗可以改合約喎，「建議你考慮少啲講啲冇乜用嘅說話。」「Tin Fong Chak」就反擊話︰「朱凱廸錯，就唔好怪『民動』啦，𠵱家啲朱粉咁㗎原來？」
「Endrew Cheung E」就頂唔順趙家賢嘅語言藝術話︰「1.『不是鐵板一塊』，都可以俾（畀）你講成『會緊遵備忘錄』，中文真係好。2. 如果『可根據』 等於不一定跟足，咁不如寫『可不根據』啦。」「Eric Chang」就鬧班人隨便演繹條文︰「『泛民』真是一代不如一代。搞個民主選舉搞到變咗假民主選舉。你地（哋）當選民是什麼呀？」
芸芸留言之中，被迫走嘅老馮原來都有留言，仲要係食晒花生嘅哈哈笑公仔𠻹。「Siu Kit Alex Kwok」就問︰「基哥為什麼要大笑？」老馮自己都唔係第一次用錯賬號出文，今次佢用咗全天下人都會用嘅藉口︰「有人盜（盜）用我的戶口出了两（兩）個大笑臉，不好意思！Sorry。」
個個都卸責忽然支持遞補機制，「Chung Ping Willis Choi」就喺老馮個facebook度留言話︰「原來一場誤會，全部人都好支持『初選』機制，包括遞補安排，咁基哥絕對應該收回成命，繼續守護『初選』機制，守護姚松炎，守護香港。」 ■香港文匯報記者 甘瑜