話說「民主動力」轉身就將「初選」個遞補機制嘅炸彈傳咗畀民主黨同Plan C袁（袁海文），等佢哋自己諗清楚要唔要出選。民主黨噚日就回應，中委會今晚會開會做決定，但有民主黨中人就認為，Plan C袁嘅政治魅力同能力等，都唔係立法會議員嘅人選喎，再加上佢哋未「洗底」，班「本土派」等人對佢哋好大「敵意」，可能都會起反效果咁話，驚最終會累街坊。咦，咁咪真係變「玩袁」？唔怪得之「民動」之前要開會討論埋Plan D啦，應該冇陰謀嘅，除非唔係。
放風冀助袁軟着陸
雖然民主黨中人放晒風希望幫Plan C袁軟着陸咁，但一日未走，一日都仲有迫害。連日批評反對派想改遞補機制嘅民主黨羅健熙，前日就喺facebook出文話有人想郁佢，想演繹成佢有私心咁話，「『初選』完第一日我已經支持跟機制，由阿基做Plan B，你班友唔跟、逼走阿基轉頭仲私下講係我私心想推袁海文上去？警告又警告過，你地（哋）係都要咁做，調返轉頭話係我私心都得？驚我啲私心，你唔逼走阿基咪冇事囉。」
咁民主黨同Plan C袁到底應該何去何從呢？「Siegfried Lee」就留言話︰「袁海文千祈唔好出聲話唔選住，等『自決派』出手話個機制已失效DQ埋佢，再捧曾健超或其他友好出黎（嚟），咁就路人皆見（不過死忠就仍然會扮唔見）。」 ■香港文匯報記者 鄭治祖