林 作
雖然話就話香港地女多男少，但係各位男士如果想搵返個女朋友好似都唔係一件易事，所以近年香港甚至台灣都興起咗好多所謂嘅戀愛導師，去教導男士點樣去追女神，甚至將個WhatsApp賬號畀埋導師去 「代媾」。但係呢啲所謂「導師」質素實在非常參差，曾經喺個節目入面見識過一個「名師」嘅「技巧」，差啲笑死我。
與其搵人救不如自救。尼爾．史特勞斯（Neil Strauss）嘅著作如The Mystery Method，The Game等結識異性書籍簡直令人眼界大開。由於本書係美國人寫嘅，好多入面嘅「招式」喺香港唔太適用。不過其實無咩所謂，我覺得最重要嘅喺學習作者嘅心態和明白個Game點玩，你就會知道應該喺咩時候做或者講啲咩嘢，「無招勝有招」。
首先，就算你其貌不揚，出去見人前都唔該至少執到乾乾淨淨整整齊齊，唔好畀人一個污糟邋遢嘅印象。靚仔啲係一定有着數，不過呢家嘢係天生，係不可改變嘅因數，所以我哋要喺啲可以練習而提升嘅方面着手。根據研究顯示，女士認為男士最性感嘅地方係頭腦（如果有），一個風趣幽默嘅男士遠比花瓶男要有吸引力得多，王祖藍都係咁先追到李亞男。所以，好好地咁練下口才，唔好吓吓淨係識講「你好靚」或者問人邊度返工，要做到不着痕跡咁討好女士同埋Lead住成個對話。
至於心態方面，最緊要係有自信，唔好怕醜。見到啲所謂女神，好多男士個心都會打退堂鼓，覺得自己高攀唔起，最後個個都係咁嘅想法，結果女神反而無人媾。要記住澤哥嗰句「其實，神，都係人」，千祈唔好怕失敗。要知道，男女之間嘅博弈係世界上其中一種最深奧嘅遊戲，就算係最頂尖嘅Pick up Artist可能都係得五六成嘅成必v。衰咗，無嘢㗎，知道衰咩嘅下次就唔會再犯，但係怕衰唔去做就肯定乜都無，畢竟「怯，你就輸一世」。
最後，作者建議其實男士們應該同時間Date幾個唔同嘅女士，一來成功率會高啲，二來就算某一位女士唔覆，都唔會有嗰種空虛感，亦都唔會Try too Hard反而嚇走人。當然，作者嘅意思唔係叫你拍住拖一腳踏幾船，唔好會錯意。總括而言，只要做到「膽大，心細，面皮厚」嘅話，相信定必可以大大提升喺呢個博弈遊戲中嘅勝算。