反對派一齊對鏡頭道歉就等於會檢討？少年你真係太天真嘞。早喺�哋道歉之前，「中箭（香港眾志）」個羅三七（羅冠聰）就喺facebook上出文，封定大家把口，話唔想見到「狗頭軍師自命不凡卻懷才不遇的所謂高見，以及智者自以為是的事後孔明」，即係輸咗都唔使聽你訓話囉。
親反對派嘅通識導師「葉一知」亦都出文反駁，「如果檢討全部都歸成事後孔明，咁呢個世界就唔會有也唔需要有賽後檢討。」
阿人都賴住先 支持者頂唔順
輸咗選舉應該檢討定唔應該畀人檢討？羅三七噚日凌晨就喺fb出文，話唔想見到「狗頭軍師」、「事後孔明」，一邊話需要檢討反省，但又同時囂張話︰「但我們不是以一味指責和高高在上的姿態指點江山，而是仔細了解和分析，找出真正的問題，再『共同』改善。」仲話選舉係大家嘅「共業」，大家義務均等咁話，仲勁過姚粉賴馮檢基。
唔止佢㗎，工黨李卓人都話︰「選戰失利要檢討，要反省，但唔好全民做咗評論員，閙（鬧）人發洩。」即係講還講，唔准鬧佢哋㗎。
好多人都頂佢哋唔順，「Benny Chong」就鬧返羅三七︰「唔俾（畀）檢討？市民唔俾（畀）發表意見？自以為是講得好岩（啱），形容你囉！」「Joe Ho」亦話︰「問題係（喺）2016年已經存在，大家講到口臭，從來唔聽取意見。有之前到而（𠵱）家，大家愛護佢地（哋），先私底下抱怨，從來唔公開指責。仲係咁嘅態度，係咪要大家都失望離開先滿意？」
「葉一知」都出文話︰「如果檢討全部都歸成事後孔明，咁呢個世界就唔會有也唔需要有賽後檢討，做乜嘢無論成敗，都應該檢討，這是應有的氣度，會帶來可能的進步。」佢仲批評羅三七呢種講法係自高自大、拒絕接受失敗同批評咁話。
葉一知林忌批輸唔起
親反對派、自居「時事評論員」嘅「林忌」揶揄佢哋︰「一班左膠操盤，一堆左膠訴求--全民退保、反房屋商品化，結果在公屋選區流血不止，靠中產區的票數勉力支持，對左膠來講有咩教訓？就係叫我地（哋）收聲，同埋話唔關選舉策略事，係香港人的錯，怪大家唔夠努力幫（自己）。」■香港文匯報記者 甘瑜