■郭卓堅前日朝早喺facebook出文爆民主黨大鑊，話自己作為該黨永久黨員，但「因為貧窮」，連續5年冇被邀請參加黨慶。 郭卓堅fb截圖過去幾日政圈熱議鴿黨（民主黨），大家都係講緊佢哋請咗咩人，但原來冇請咩人仲精彩。「長洲覆核王」郭卓堅前日朝早就喺facebook出文爆鴿黨大鑊，話自己作為該黨永久黨員，但「因為貧窮」，連續5年冇被邀請參加黨慶，「這個黨只記得參選時會叫我投民主黨後（候）選人一票。」曾任鴿黨地區發展主任嘅呂永基都加入玩踢爆，話自己當年仲喺鴿黨做義工，開到聲想參加黨慶，都要畀入場費，慶祝會仲連飯都冇得食𠻹！
覆核王篇文第一句就話「民主黨憎人貧窮」，仲話社民連、公民黨、「青年新政」等黨慶都有請佢。有人就問係咪一時唔小心漏咗咋？覆核王霸氣反問︰「可以連漏5年以上嗎？」佢仲嬲到話︰「今天連政府官員都被邀請，我才爆大鑊，從此以後我是一位無黨派人士，我做甚（什）么（麼）與民主黨無關。」
網民紛批鴿黨涼薄
好多人都加入踩鴿黨嘅涼薄。「Morris Leung」問︰「你有無三萬蚊畀人唱首歌呀？」「百彈齋主」批評︰「一個黨連自己嘅黨員，仲要係一個有知名度嘅黨員，竟然連邀請都無......」
「Louis Arsenal」就話︰「而（??）家睇清楚呢班偽君子都為時未晚。」「Kwun Man Kong」建議︰「脫黨有運行，睇區議員（區諾軒）就知啦！郭生不防（妨）考慮吓。」
已退黨保平安嘅呂永基就留言出文加入踢爆。佢話，自己2009年喺鴿黨主席胡志偉度做義工都有咁嘅感受，「還記起，胡志偉在獲授MH（榮譽勳章）的慶祝晚會，邀請我們幾個義工出席，以為可以有餐慰勞飯，但怎知開席前，胡志偉叫職員叫我們幾位義工起身，到台側的椅子坐，讓位給街坊。最後，我們幾位義工做足一晚打雜，飯都冇得落肚，最後連一聲多謝都無同我們幾位義工講一聲。」
呂永基再數到2003年，話當時佢哋幾個最貼身嘅義工開聲想出席黨慶，但胡志偉要佢哋幾個半失業嘅義工每人畀350蚊入場費，最終大家都心淡，「所以我深深感受到郭卓堅的心情，一種不被黨尊重及只被黨利用的不悅感覺。」
搞次黨慶有咁多風波，鴿黨都算犀利嘞。■香港文匯報記者 甘瑜