■《852郵報》發帖話鄭泳舜「漏讀誓詞」。 《852郵報》fb截圖立法會前日宣誓順順利利咁完成，但反對派網媒《852郵報》噚日就有個「開心大發現」，話民建聯鄭泳舜「漏讀誓詞」喎。開頭真係嚇一跳，然後得啖笑，立法會誓言明明有3款，人哋揀咗A餐唔揀C餐就話人錯？唔好玩啦。
《852郵報》噚日出文，話本身係基督徒嘅鄭泳舜作「非宗教宣誓」，但就冇跟《宣誓及聲明條例》第五（1）條規定，以「本人，謹以至誠，據實聲明及確認」開始喎。佢哋喺facebook個post仲話︰「鄭泳舜宣誓內容都唔係『準確、完整』。」唔少網民隨即就附和話要DQ鄭泳舜。
咁事實係點呢？根據立法會嘅文件，立法會誓言有3款，兩款係宗教式立法會誓言，分別以「我，___，謹此宣誓」同「本人，___，謹對全能天主/全能上帝宣誓」開頭；一款係就咁誓言，亦即係《852郵報》講嘅「本人，___，謹以至誠，據實聲明及確認」。鄭泳舜讀嘅正正就係第一款宗教式立法會誓言。查都唔查吓就話人唔準確、唔完整，真係想笑死人咩？■香港文匯報記者 甘瑜