梁振輝 香港資深出版人
輝仔：咦，婷婷，早兩日聽你阿媽講，話你出咗去玩，點解咁快就返咗嚟嘅？
婷婷：呢排喺報館趕緊個「籠屋1」專題，所以咪「係咁意2」上深圳「打個白鴿轉3」就返嚟囉！
輝仔：吓，估唔到今時今日仲有「籠屋」呢家嘢！
婷婷：生活逼人又就腳，冇計喇！
輝仔：哈，你話最初係點諗到呢種咁唔人道嘅居住方式吖嗱？
婷婷：聽講係喺「逼逼狹狹4」嘅「白鴿籠5」度偷橋嘅！
輝仔：講返轉頭吖，住響嗰度啲「籠民」已經夠慘㗎喇，聽講仲長期畀人歧視㖭！
婷婷：所以我喺專題度咪用咗「白鴿眼」嚟形容嗰班睇低人嘅人囉！
輝仔：嘩，識得用「白鴿眼」撈埋「白鴿籠」嚟講，你老總肯定讚你啫！
婷婷：我唔只話佢哋「白鴿眼」，仲會話埋佢哋「牛咁眼」㖭噃！
輝仔：乜嘢話，「牛咁眼」唔係話有人望住人「眼都唔眨6」嘅咩？你應該講「狗咁眼」，「狗眼看人低」吖嘛！
婷婷：好彩有你指正，唔係出咗街就真係「抬棺材甩褲--失禮死人7」嚹！嗱，輝哥哥，以後就由你守尾門嚹吓！
輝仔：好，得閒先喇吓！
「白鴿」，又叫「乳鴿」，是因為廣東人對與喪事有關的「白」字有所忌諱，而「白鴿」的羽毛呈「乳」色，所以有此別名。一般人多誤以為「乳鴿」是在「哺『乳』期」的初生鴿。
有謂「遭人白眼」，即「畀人睇小/睇低」（給人看小/看低/看扁），當中的「白眼」指朝上或朝兩邊看時露出的白眼珠。用「白眼」看人就表示對他/她輕蔑或厭惡。對於這類眼光勢利的人，廣東人會用「白鴿眼」這個含「白眼」意思且形近的用語來形容之。
有說，「白鴿」有靈性、懂風水，哪家運程好？哪家豐衣足食？都看在「眼」裡，所以如果有白鴿飛來你家築巢就表示你家有一定分量，無怪舊時人家買屋會看看屋內有否鴿子生活的痕跡了。此說法可從以下俗語得以印證：
雀兒揀着旺處飛
就此，「白鴿眼」一詞不脛而走。以下一個俗語與「白鴿眼」有異曲同工之妙：
狗眼看人低
歷來，人們對「白鴿眼」和「狗眼看人低」的詮釋多所誤解，如：白鴿因眼光銳利，在天上飛時望下去就像有些人擺出一副不可一世的姿態瞧不起所謂較低下的人一樣；狗看東西時，都是把大東西看小、高東西看矮。看過以下兩則笑話，讀者應有一定的理解：
雞仔：白鴿仔，你踩屎喇！
白鴿仔：雞仔，你都知我係白鴿嚟㗎喇，「對眼生響額頭度」吖嘛，地下有嚿金都睇唔到喇！
X X X
肥仔：狗狗，我揸住嚿你最鍾意嘅骨頭，睇到冇呀！
狗狗：肥仔，淨係睇到你個「大肚腩」咋噃！
「白鴿」的一雙眼睛長在兩額側，視線自然向上。狗站立時的水平視線只及一般人的下身，屬一個低的高度。由此可知上述情況都是歸咎於牠們於正常狀態時的視線，即是：
白鴿眼，朝上不朝下；狗眼，朝下不朝上
兩者的「朝上」、「朝下」有其分別。對「白鴿」而言，「朝上」和「朝下」分別指媚諂權貴與鄙視卑下；對狗而言，則分別指看得起與看不起，所以兩者的行為大致上是相同的。據此，也有人用以下言詞來形容那些瞧不起人的人：
對眼生響額頭度；生咗對狗眼
____________________
1、香港有些舊樓，把租出的床位以鐵絲網圍繞。由於每張床位猶如一個籠子，人們戲稱這種貧民窟做「籠屋」，住在該處的人做「籠民」。
2、「係咁意」指是有這個意念，但礙於形勢或當事人態度輕率而隨意為之。「意」此時讀「綺」。
3、「白鴿」，指養鴿，其習性是「早上往外飛，傍晚轉回來」，意味着白鴿打個轉兒就回來了。人們就用「打個白鴿轉」來形容某人不會走遠，轉個頭就回來。「鴿」，文讀「gap3/急1-3」，白讀「gaap2」、「gaap3/甲」；「打白鴿轉」時「鴿」多讀「甲」。
4、「逼狹」指狹窄擠逼。廣東話的「逼逼狹狹」就是由此而來，當中的「狹」讀「gip6」。
5、上世紀四十至六十年代，香港有些舊樓間了多個房間，連走廊也放滿了碌架床，作出租用途。由於一層樓住了多戶人家，人們便戲稱這種環境逼狹的居所做「白鴿籠」，近年則叫「蝸居」。「籠」此時一般讀「壟」。
6、「眨」指眼睛很快地開合。「眼都唔眨」指眼也不眨，「眨」此時讀「斬」，演變過程如下：
眨(faan2)；變韻母→faam2；變聲母→斬(zaam2)
7、「甩褲」指褲子鬆脫，屬失禮的行為。抬棺材時，除了其拍檔外，就只有在棺材裡的死人，所以「抬棺材甩褲」就是「失禮死人」了。
【專欄簡體版】https://leoleung2016.wordpress.com/