梁振輝 香港資深出版人
輝仔：婷婷，返到公司未？
婷婷：啱啱先返到咋！
輝仔：大雨就係大雨咗啲，但你住得好近咋噃！
婷婷：激鬼氣！天文台明明話成個禮拜淨係密雲、間中有小雨，點知返公司嘅半路中途就倒水咁倒；睇下部手機，原來已經係「黃雨」；我坐架巴士死咗火，咪搞成咁囉！咁你又點呀？
輝仔：話就話「黃雨」，真係同「黑雨」冇分別，唔係點會好似「落狗屎」咁吖！我都係返到公司「無耐1」咋，不過我竟然係第一個返到去喎！
婷婷：天文台點搞㗎，「甩轆2」成咁！
輝仔：天氣嘅嘢，點「話得埋3」，咪似你哋女人啲心態，好難捉摸嘅！
婷婷：輝仔，一有機會就「入位4」，算點先！
輝仔：喂喂喂，下個星期連續三日假，為為話約埋你同男友去番個廣州東莞三日兩夜嘅超豪美食團，有冇興趣？有就而家我報名，好快爆㗎！
婷婷：No喇，睇番上次，班團友食自助餐嗰陣，好似啱啱放監出嚟咁，真係「失禮九族5」呀！
輝仔：唔係咁，點「cover番個本6」呀？
婷婷：但都唔使「餓狗搶屎」咁啩？
輝仔：「民以食為先7」吖嘛！
婷婷：藉口嚟啫！我就話同食冇關，而係同中國人普遍乜嘢都爭先嘅品性有關！
輝仔：我哋中國五千年文化，點解搞成咁嘅？
婷婷：呢啲都係文化，不過係「狗改不了吃屎」嘅文化啫，好學唔學！
一提到「傾盆大雨」，人們多會形容為「落狗屎」。究竟為何有這個講法，又為何不叫「落貓屎」或者用其他動物的糞便來比喻呢？網上流傳，「落狗屎」的講法源自一個英國俗語：
It is raining cats and dogs.
更指出狗屎比貓屎大且也來得較頻密，因而有此講法。筆者認為以比較貓狗糞便的性質為依據實屬無稽，且粵俗豈會來自西方。查舊時的城鎮，排水系統管理不善，真個是「落大雨，水浸街」。當雨「落」得很大時，道路嚴重積水，很多狗隻遭浸死，「狗屍」隨處可見，有人就以「落狗屍」來形容滂沱大雨了。將「屍」諧音化成「屎」，「落狗屎」這個俗不可耐的講法便跑出了來。無獨有偶，上面提到的英國俗語也是用來形容強勁雨勢的。查此話非指有貓狗在下大雨時從天掉下；據說是在十七世紀，很多英國城市的河道在滂沱大雨時泛濫，導致大量貓狗屍體隨水漂流。
話說回來，確認以「屎」作「屍」的諧音化字，這不是筆者的第一次；對上一次，是「擔屎唔偷食」，其原句是「擔屍唔偷食」--抬屍的仵工不會盜取死人的遺物，比喻為人忠直。
當人們面對食物時狼吞虎嚥、風捲殘雲，或爭搶，有人會以「餓狗搶屎」來形容這種醜陋食相，也會說「餓鬼投胎」；偶有以此形容「飢不擇食」的心態。
有句俗語叫：
狗改不了吃屎
表面的意思是「吃屎」是狗的習性，是改不了的。比喻「死性不改」，即很難改變一個人的性格，尤指壞習慣。有人就很不明白：「屎」是排泄物，絕對不是什麼好東西，何以狗會吃或爭搶呢？據一些資深養狗人士所說，狗是會吃屎的，但大多發生在以下幾個情況之中：
1.「狗」吃我吃
2.糞便中殘留着未完全消化的食物
3.非常飢餓
以下是與「狗改不了吃屎」意近的中西諺：
江山易改，本性難移/江山易改，稟性難移
猴穿衫以後也是猴
牛牽到北京還是牛
婊子立了牌坊還是婊子
People never change.（人永不會改變）
Old habits die hard.（老習慣是死也改不了的）
A leopard can't change its spots.（豹子無法改變其身上的斑點）
A fox may grow gray, but never good.（狐狸會變老，但永不會變好）
A crow is never the whiter for washing herself often.（烏鴉不會因經常洗澡而變白些）
____________________________
1.「耐」有久的意思；「無耐」就是不久，「耐」讀「耐6-1/耐6-2」。
2.「甩轆」指嚴重失誤。
3.「埋」，有葬的意思，喻死亡，死了就什麼也「塵埃落『定』」了，於是可用「埋」字借喻「定」。「話得埋」就是斷言某事為事實；「話唔埋」就是說不定。
4.「入位」指對對方的特性/缺失作針對性攻擊。
5.「九族」指直系親屬，包括高祖、曾祖、祖父、父親、自己、兒子、孫子、曾孫、玄孫。「失禮九族」喻非常失禮，致令親友顏面無存。
6.「cover番個本」指拿回成本。
7.「民以食為先」，源自「民以食為天」，亦作「民以食為本」，意指人民以糧食為生存的根本。形容民食的重要。後以此比喻人嗜吃的天性。由於「天」、「先」音近，加上「為先」有最重要的意思，有人就說成「民以食為先」了。
【專欄簡體版】https://leoleung2016.wordpress.com/