離地呢樣嘢呢，就唔係好似反對派口口聲聲話係「達官貴人」嘅「專利」嚟嘅，好似「中箭」（「香港眾志」）阿河童（黃之鋒）咁啦，就喺七一遊行期間玩踢爆，話有民主黨立法會議員去探一個因為暴力衝擊而入冊嘅人，當聽到個犯呻入面啲嘢難食時，竟然問有無某著名快餐店咁難食，搞到個犯O晒嘴。河童咁樣踢爆班老鬼，佢哋當然唔多高興啦，反問係咪要食過皇家飯先可以探監！
問皇家飯係咪難食過快餐店
河童喺七一當日接受網媒訪問，被問到有啲年輕人唔鍾意「泛民」時，搬咗民主黨出嚟去插「泛民」幾咁離地、脫節。
佢話民主黨有個立法會議員去探監嗰陣，問個犯監獄啲嘢難唔難食，咁個犯當然答難食啦，之後個議員竟然問：「有無大家樂咁難食呀？」個犯聽完即時呆咗，之後仲同人講以後唔好再叫民主黨啲人嚟探佢！佢仲不惜賣廣告嚟補多一刀：「其實，我覺得一哥豬扒飯幾好食。」
越講越起勁，河童燒埋公民黨嗰疊，話上一輩嘅人會覺得禮節性款待同交流好合理，就好似公民黨黨魁戇橋（楊岳橋）會請立法會主席梁君彥去佢婚禮影相，但年輕人未必咁諗喎。
退出咗「青山新症」（「青年新政」）嘅「獨」人黎耀駿就踩多腳：「民主黨咁多位議員，你哋平時或者好得閒啦，但真係唔好嚟喺傷口上面撒鹽喇，好唔好……」
佢仲好抵死咁諗到幾個例句，好似「監獄有無吹住冷氣咁凍」咁，認真吹脹！
網民揶揄白痴都可以做議員
唔少自認年輕人嘅網民喊打喊殺。「Perry Chan」叫河童交人：「公佈嗰條茂利係邊個，唔該！咁白痴都可以做議員。」
「Gary Wong」就買咗個大熱人選：「係咪黃碧雲呀？」「John Wong」亦都話：「以100分滿分，幾大快餐店雖然難食，但都係人仲可以食，你可以rate（評）佢30分至40分左右。囚犯食嘅你頂多rate到10分。你仲要問呢句？」
不過班老叔父唔係咁諗。「鄧文釗」就質疑民主黨係咪就等於「泛民」，個人行為係咪就等於「泛民」行為，仲意有所指：「正如通街都見好多不知所謂、行屍走肉嘅年輕人，但又怎能說所有年輕人都是沒理想的廢物！」
「Mark Chiu」就話：「如果因一個人離地，就全部不理三七廿一的撇棄，是那（哪）門子的民主體念？」「Anthony Chan」更加精警：「只可以係草根階層才可以參政？定係要坐過監食過監獄飯才可以探監？」 ■香港文匯報記者 陳庭佳