■長毛「益友」「JoJo Wu」在fb寸爆長毛想「永續參選」。 「JoJo Wu」fb截圖「唔可以因為份糧永續參選。」61歲嘅工黨「難民之父」張超雄講明下屆立法會唔會再參選，本來應該都只係佢個人嘅事，但係佢呢句似乎就寸親年紀仲大過佢、但喺行動上反映出想「永續參選」嘅街工白頭忠（梁耀忠）同社民連長毛（梁國雄）。網上班花生友寸爆「雙梁」死霸爛霸就梗㗎啦，但就連「自己友」學者都擰晒頭，不滿反對派有人胸襟狹隘、目光短淺兼戀棧席位，呢堆花生都咪話唔精彩！ ■香港文匯報記者 何西
前排政圈一直傳緊張超雄唔會喺後年立法會換屆選舉排頭位，而會喺新界東幫工黨主席、史上最「短命」區議員郭永健抬轎，換言之就係告別議會。
佢噚日證實唔會再參選，最多只係幫郭永健抬轎，因為「無人係不能夠取代」、「覺得自己唔應該喺一個位太耐」喎。
稱做議員不應為份糧
佢仲話自己雖然今年啱啱買咗樓，唔做議員就要再搵過份工供樓，跟手更加爆出呢句金句：「做議員唔可以因為個入息而做，呢個唔係一份工，如果我因為經濟需要而做呢個崗位，我就立即應該唔好做嘞！」
咦？點解咁面善嘅呢句？點解橫睇掂睇，都似係寸緊將後生仔逐個踢出街工、兼且唔認會幫佢口中嘅「接班人」黃潤達抬轎嘅白頭忠，同埋死搲爛搲都要搲返個議席、驚死無50蚊開唔到飯嘅長毛嘅？
聽到張超雄暗寸長毛，經常都喺facebook對住長毛隔空喊話嘅「益友」「JoJo Wu」當然爽皮啦：「毛哥，你為參選而生存，仲成日叫人參選參選。點睇你老友張超雄落×你面，寸你為份糧而永續參選？」
另一個「益友」「陳興旺」就嚟招一石二鳥：「嗱！長毛賊，呢鋪我撐你，唔通你走去做看更咩。梁耀忠都永續參選啦！佢得，你都得！」
親反對派嘅理大助理教授鍾劍華亦都喺網媒寫咗篇文，除咗大篇幅幫佢前同事張超雄講好說話之外，居然仲寫咗段咁嘅嘢：「不過，在適當時候退下來，不再戀棧議員席位，確實是『泛民主派』內一個長期未能解決的問題。也確實有一些『泛民主派』的代表，表現出來胸襟之狹翳（隘）、目光之短淺及對席位的戀棧，令人失望之餘也搖頭嘆息，更是壞了『泛民』大局。」
前街工「勞工組」成員王曉君分享咗鍾劍華篇文，邊個唔知你想借啲意寸你前老細白頭忠吖？「Carrie Ching」就估計白頭忠聽到有人叫佢讓位，一定會爆出呢句：「我唔制呀！」
網民拒盡信話聽住先
不過，反對派講嘅嘢都係聽住先。「Danny Tse」叫張超雄真係走人先好講，「一陣唔夠錢用，或『假難民』交唔到數，又搵藉口連任。極不可信。」
