■李偉峰發帖批趕走老馮不民主。 fb截圖經常講民主嘅，其實好多時都係最唔民主嗰個。上次立法會九龍西補選，「自決派」踢走經過初選做「Plan B」嘅民協前主席老馮（馮檢基），11月又嚟一次補選，「自決派」索性走後門冧掂其他反對派大佬，連初選都唔搞，「Plan B」都欽點埋，實行獨裁一條龍。有部分屬於反對派嘅小薯，似乎都唔係好睇得過眼。跟民主黨立法會議員涂謹申搵食嘅李偉峰，就質疑逼老馮唔選嘅人無恥，打散「民主運動」。
跟規則照逼退 「仲講咩民主？」
老馮近排向傳媒大爆上次補選時被「民主動力」創會召集人袋鼠碩（鄭宇碩），「自決派」蟲炎（姚松炎）同朱隊友（朱凱廸）逼退嘅內幕。
身為民主黨油尖旺社區主任嘅李偉峰，就喺fb轉發咗老馮爆料嘅新聞，仲發文話：「幾唔鍾意馮都好，311補選無可能逼佢退（plan b咋，唔係正選）。佢跟個遊戲規則去玩，玩咗，明明有得排隊，隊都未排就逼佢走......仲講咩民主？」
新聞中，傳媒問袋鼠碩有關老馮爆佢大鑊時，佢回應稱：「不回應，我不當他（馮檢基）是民主運動的人。」李偉峰就喺帖中回應「金句」：「不當跟遊戲規則的人是民主運動的人。」帖子仲標註「邊個先係想打散民主運動」。
訟黨友暗寸朱凱廸獨裁
前民主黨成員、後代表公民黨參加過區議會選舉的王德全，就轉發咗李偉峰此帖，仲揶揄朱隊友：「當權者話事 。且看朱兄領風騷！」疑為民主黨港島區職員嘅「Ka Sing Lo」則不點名鬧袋鼠碩：「教授憑乜指手劃腳呀！學院內的蛀蟲！有本領就出來搞嘢啦！」
「Donald Chow」也對此忿忿不平：「票都未投就要逼走一啲網民唔鍾意嘅候選人？ 似乎有人在背後為自己的利益服務！ 呢啲就叫做民主咩？ 」前大埔區議員羅舜泉亦留言：「香港民主派根本就是獨裁。用民主欺騙世人，用民主騙取黑金。」
■香港文匯報記者 陳川