沙中線工程不斷被揭發出現問題，懷疑當中有人隱瞞，香港社會各界均要求港鐵交代，政府究責，但反對派為了政治目的，只係將矛頭指向建制派，聲稱通過沙中線撥款，以至在立法會內未有支持引用特權法調查事件嘅建制派要為此負責喎。中文大學「獨」講師劉正就喺fb發文，話立法會表決呢兩單嘢時，反對派都有人缺席喎，咁如果講到建制派要負責任，咁呢班反對派議員係咪同樣要負責任？喂，你班鬧建制嘅「黃屍」，唔好扮睇唔到呀！
黃屍無視反對派懶投票
沙中線工程被揭發有問題後，反對派中人唔係諗點樣解決，而係將時間花喺攻擊「政敵」上。劉正就睇唔過眼，發帖話：「見倒（到）好多黃屍又走出黎（嚟）四處宣揚建制派點樣一邊扮要求徹查一邊響立法會投反對票，誇張啲嘅仲話以後沙中線有死人，建制派要負上全責──咁當然我就要響度問，當日無盡議員責任投票嘅『飯民』議員，又要負上幾多責任？」
佢話，財委會之前審議沙中線追加撥款8.47億元，「蘋果立場852共媒01呢啲飯民大台媒體全部都只會報廖長江投錯票，原來今次表決多達10個非建制派議員缺席投票，令表決結果反勝為敗......涂謹申李國麟毛孟靜梁繼昌郭家麒葉建源楊岳橋陳沛然陳淑莊羅冠聰全部缺席投票。」
劉正話：「知唔知今次呢個財委會表決係唔駛（使）分組點票，只要呢10個缺席議員有8個投反對票，個議案就會以26票贊成27票反對比（被）否決。......而最×可惜嘅係，無論係呢班濕×KOL、定係佢地（哋）班港豬聽眾，一律已覺得作為立法會議員，唔投票唔再係問題，就算有機會『抗爭』成功而佢地無做到，都唔需要作出任何追究，唔通呢啲死蛇爛鱔式議政，就係策略派嘅所謂策略？」
劉正鬧《立場》幫手遮醜
針對所謂「建制唔支持立法會用特權法查沙中線」，劉正點名鬧《立場新聞》：「黃屍媒體大煲建制派就P&P查沙中線、反對/棄權查沙中線、土瓜灣站醜聞，但永遠唔會提郭家麒、陳淑莊、郭榮鏗、李國麟、葉建源係連票都唔投。」
佢話：「你睇垃（立）場啲上下其手真係好趣緻（致），當日沙中線特權法表決，見倒（到）得郭榮鏗一個無投票，就將所有缺席投票嘅議員標起黎（嚟）；但去到土瓜灣站特權法表決呢，因為見倒（到）陳淑莊郭家麒李國麟葉建源成四個缺席投票咁多，就即刻唔敢Highlight出黎（嚟）比（俾）人發現。」
劉正好感嘆咁話：「其實垃圾（《立場》）嘅編輯都係杞人憂天，即使係因為『飯民』議員缺席甚至倒戈而通過嘅政府議案，黃屍都一樣係扮睇唔倒，......乜你地（哋）唔係好×關注要用P&P（特權法）查沙中線工程架（㗎）咩？哦原來去到票就可以唔投、齋吹就得？然後我都係問番（返）同一個問題：反正選你地（哋）入去你地（哋）投票都係輸×硬，然後你地（哋）就用呢個藉口黎（嚟）解釋點解成日可以偷懶唔投票，係咁嘅話，選你班友入去做乜？乾逗（𢭃）人工？」■香港文匯報記者 陳川