咩叫動輒得咎？咪就係連鞠個躬都要俾人鬧囉。歌手盧凱彤離世，唔少人日前都有去悼念，已退出民協嘅老馮（馮檢基）都係。不過，工黨何秀蘭前晚就乘機出post「屈基」，攞返超過二十年前嘅嘢嚟講，話老馮曾經反對反歧視條例草案，所以見到對方去追悼同性戀嘅盧凱彤，自己「無法不憤怒」喎。不過，何秀蘭最終抽水抽着火水，大多數網民見到佢嘅「憤怒」，反問佢︰「反『平權』同尊重死者去鞠個躬有咩衝突？呢啲時候都仲係（喺）度抽水。」老馮就食住個勢輕鬆出post還擊︰「哀……為何要利用人家的白事，搞你的政治？」
補選近了，反對派中人吓吓都抽水攻擊潛在嘅同路對手，但唔小心就一個回力鏢車返埋自己塊面。話說老馮日前出席盧凱彤嘅告別禮，何秀蘭就喺facebook出post話，悼念盧凱彤「不限於她的親友、知音、性小眾及支持平權者」，但老馮曾經就反歧視條例草案投反對票，「令性小眾及其家人仍在痛苦深淵」，所以自己見到老馮出席追悼，仲同家屬親友握手，「我無法不憤怒。」
盧斯達批補選前打壓對手
真係好大嘅罪名！馮檢基在回應傳媒查詢時就表示，佢同盧凱彤是Kickboxing班的同學，「我哋做過兩三班同學，有傾偈」，所以自己先會同3名Kickboxing教練一齊出席告別禮，並強調盧凱彤不幸離世，與歧視無關，「希望大家理性啲」，又狠批何秀蘭「唔好拎白事做新聞」。
唔少人亦唔受何秀蘭呢套。「無待堂堂主」盧斯達就喺佢fb專頁度出文話︰「何秀蘭是工黨，剛加入公（工）黨的劉小麗要去補選，最大對手是馮檢基，要打擊是一定的，但也不要連人家的告別儀式也利用來做文章，用無關的逝者來（打）壓政治對手吧？玩身份政治也不要走火入魔。」
佢仲話，如果要比較，老馮同小麗老千都冇乜分別，而何秀蘭都唔係咩好嘢，再貼埋何秀蘭之前嘅fb帖文，反問︰「梁天琦大審時立場不同的何秀蘭到場影相，又何嘗不是抽水自奉（捧）？」
雖然都有網民跟住何秀蘭去質問老馮憑咩去出席，但更多人係鬧返何秀蘭轉頭。「Oscar Tsang」直接喺何秀蘭fb留言反問︰「不限於親友、知音、性小眾及支持平權者，但限於立法推動平權保護小眾？我唔明個邏輯？佢唔可以係盧小姐親友？定係因為政見唔同？」「Joseph Leung」亦問︰「我從來都不喜歡馮檢基，但人哋去鞠個躬都唔得？」
老馮見形勢利己即還拖
相關新聞下嘅網民留言鬧得仲犀利啲。「Ricky Chan」問︰「反『平權』同尊重死者去鞠個躬有咩衝突？呢啲時候都仲係度抽水。」「Kelly Leung」怒斥︰「唔支持同性戀等於絕交？有些人口講爭取民主，爭取言論自由嘅人，他們往往是最獨裁，最排斥異見嘅人。」「CL Chu」批評︰「死者的家人也不反對馮先生出席，何時輪到何秀蘭憤怒！」「Chin Yau Li」攞返何秀蘭嘅經典事例話︰「何秀蘭傻㗎，游慧（蕙）禎留長髮都畀（俾）佢罵唔環保。」
網上群情咁洶湧，老馮再轉發返自己解釋嗰段新聞，再講句︰「哀……為何要利用人家的白事，搞你的政治？不要因政治失去理性。」就咁已經贏晒。所以話呢，真係抽水都睇清楚係咩事啦，地球唔係圍住你哋喉住嘅補選議席嚟轉㗎。■香港文匯報記者 甘瑜