■特首辦主任在「喜樂餐飲教室」包場請客。 林鄭月娥fb圖片香港文匯報訊（記者 陳川）特首林鄭月娥一直關心弱勢社群。前晚，特首辦主任喺長沙灣一間小店「喜樂餐飲教室」包場請客，二三十人好熱鬧，仲充滿正能量：因為大家都係嚟支持小店老闆宋太。
林鄭月娥喺fb上載咗張相，顯示除咗呇菑v同特首辦主任陳國基之外，仲有勞工及福利局局長羅致光，立法會主席梁君彥，民建聯立法會議員葛珮帆、劉國勳，工聯會立法會議員郭偉强，經民聯立法會議員林健鋒，旅遊界立法會議員姚思榮，觀塘區區議會主席陳振彬等都有幫襯「喜樂餐飲教室」。
小店專請智障人士賣平飯
林鄭月娥喺fb嘅帖文話，宋太喺丈夫去世後，獨力湊大患有自閉症同輕度弱智嘅女兒。為咗畀佢有工作機會，宋太近年用佢嘅積蓄同社會福利署嘅資助開設社企餐廳。
雖然經營小店唔容易，宋太仍樂於助人，午市提供廉價飯盒畀附近嘅打工仔，又聘請其他智障人士喺店內工作。「宋太的故事，體現咗香港人勤奮、堅毅、自强不息嘅特質，令人十分敬佩！」
林鄭月娥最後話：「小店就喺福華街，我鼓勵大家多啲去幫襯，支持宋太！」
郭偉强盼人人出力起作用
有份出席「飯局」嘅郭偉强亦發帖：「老實說，愛心社企有很多，想幫晒都唔容易。不過一人一分力，應該還是有作用的。」
佢仲標註「宋太加油」、「社企的團隊加油」等。
年屆六旬的宋太以前係懲教人員，佢曾經喺接受傳媒訪問時坦言，自己為咗照顧患有自閉症和輕度弱智嘅女兒而辭去工作，但當女兒只得半歲大時，同樣做懲教人員嘅丈夫不幸病逝，她一個人帶大女兒，做過保險、超市收銀、電話傳銷等，2011年用積蓄開第一間餐廳，到今年已先後開過3間餐廳。
佢開餐廳，唔單止係想訓練女兒有生活技能，將來可以養活自己，同時亦聘請其他智障及自閉人士，當係幫埋其他人。不過，佢之前兩間餐廳都因為蝕本而結業，現在開社企「喜樂餐飲教室」，但生意就唔係幾好。雖然佢自己每個月都唔攞人工，但每月仍然虧損1萬元。
雖然生意唔好，但佢都繼續幫人。上個月，佢就推出午市20蚊外賣自取飯盒，如自備餐具和餐盒可以再減兩蚊，希望幫打工仔慳錢。