「宇宙唯一民主派」李呃人（李卓人）喺九西補選輸咗，反對派同建制派嘅差距由「3．11」補選嘅2,000票擴大到成萬三票，之但係佢哋好似未瞓醒咁，仲未識自我反省，到呢一刻都仲起勢咁搵人祭旗，首當其衝當然係加埋李呃人啲票都唔夠陳凱欣抽嘅老馮（馮檢基）啦，而叫人唔好賴老馮嘅反對派中人亦都被片到體無完膚。好似學聯前秘書長周永康同前副秘書長岑敖暉呢pair人，「幫」老馮講咗幾句好說話，就俾學聯老鬼廢陶（陶君行）翻舊賬，話佢哋搞散學聯。反對派嘅所謂「檢討」，都只不過係口號嚟嘅啫。有人就覺得佢兩個同埋其他「幫」過老馮口嘅反對派中人，不過係逐啲逐啲黐返反對派個「貞節牌坊」，小罵大幫忙啫！ ■香港文匯報記者 陳庭佳
喺仲點緊票嗰陣，身處外地嘅周永康亦都湊熱鬧，喺facebook出咗個po（帖文）隔岸觀火，講到明「不要×票黨」同「不要鎅票論」，仲話今次如果係「Plan A」小麗老千（劉小麗）去選都唔見得會贏，即使係「本土民主前線」「獨琦」（梁天琦）去馬都未必吸到「×票」嘅反對派選民支持，「其實我哋×夠未？奚落夠未？」
周永康岑敖暉小罵大幫忙
岑敖暉亦都叫反對派唔好搵老馮嚟賴，「好似上次（『3．11』補選）咁，繼續搵嘢賴，賴（馮檢）基賴天賴地，見葉不見樹林，下次下次，也會一樣」，仲警告反對派自「佔中」之後已經無咗共同目標，加上「DQ」事件搞到失票𠻹，「2020年（立法會選舉）其實會燒得更旺盛，情況大有可能比今天、『3．11』更糟糕。」
仇思達質疑同《蘋果》夾埋
唔知係咪收到「有關方面」嘅「午夜兇鈴」啦，結果出咗之後，呢pair人嘅反應180度轉變。兩粒鐘之前仲講緊「不要×票黨」嘅周永康，就大篇幅質疑老馮敗選之後嘅扑咪內容，特別係如果反對派再不民主佢就會再出嚟挑戰呢句：「我心裡面好想問，作為（前）『民主派』成員，佢點睇『民主派』失去議會否決權？一直被認為是反對派關鍵的唯一制衡權力？係咪基哥都認同𠵱家香港係有自由民主不受干預的選舉？所以最重要是內部民主機制？」
反對派喉舌《蘋果日報》都有報道岑敖暉叫人唔好賴老馮，「無敵神駒」仇思達就覺得佢哋呢pair同《蘋果》已經夾晒口供：「牠（他）們的『公道話』，是在李卓人票箱開了大半、鐵定落選後才發表的。在此之前，牠（他）們對『泛民』的一切敗德劣行視若無睹；而牠（他）們的戰友羅冠聰、黃之鋒更為盲撐李卓人站台。如果李卓人當選，牠（他）們還會忽然公道嗎？牠（他）們現在只是配合《蘋果》，為『泛民』止血，不必認真。」
反對派入面亦都有人擺明唔妥佢兩個。廢陶大前晚喺網台《香港花生》節目入面，就響晒朵咁鬧佢兩個，仲數到去大前年退聯潮，質疑佢兩個無好好處理，「呢條𡃁仔（岑敖暉），你同周永康一咋人，已經搞散咗我哋60年嘅學聯，嗰條數都未同你計！」
講「鎅票」老馮先係自己人
自稱已淡出政界、專心從商嘅「人民力量」前主席袁彌明，就喺岑敖暉個facebook度同「傘後團體」「西環飛躍動力」召集人葉錦龍唱雙簧。袁彌明質疑李呃人話自己輸全因為政府、建制派、老馮等等，自己就毫無責任。葉錦龍就話反對派明明本身有好多資源可以共用，「偏偏大家為選舉，就要自己人打自己人。」
袁彌明之後加把口，話反對派講「鎅票論」嗰陣，老馮就係「自己人」，葉錦龍就補埋下一句：「到換屆選舉時又不是同路人了。」