廢陶喺大前晚個網台節目度辣着咗好多人，除咗周永康同岑敖暉外，仲有出名口沒遮攔嘅親「本土派」藝人杜汶澤𠻹。話說節目入面開出「新東補選杜汶澤對長毛」呢個盤口，廢陶就暗指如果杜汶澤去馬係「老共」嘅主意，佢只係收錢做嘢，因為佢老婆田蕊妮喺內地有大把工作喎。杜汶澤嚟個大爆發，爆晒粗話要「打×死」廢陶同另外兩個主持，叫佢哋報定警咁話，但好似係刑事恐嚇嚟㗎喎阿杜生？
聲言挑機長毛被指「鎅票」
杜汶澤呢個名首先係由以「時評人」自居嘅劉細良提起嘅，當時佢提到如果杜汶澤喺新界東補選去馬，對撼社民連「長毛」梁國雄，相信唔少反對派選民會投畀前者，甚至會由前者贏𠻹，而「佔中十死士」之一嘅徐少驊就抽水：「到時長毛應該『鎅』到啲票啩？咁嘅處境仲唔係長毛『鎅票』？到時長毛做咗『鎅票基』！」
一輪嬉笑之後，同長毛同黨嘅廢陶就一臉正經咁要「踢爆」杜汶澤，話對方突然間咁「本土」、咁「反共」，但好似仲繼續有人搵佢做嘢，仲提埋田蕊妮喺內地有大把工作，「奇怪嘞，無理由唔封殺你喎？有殺錯無放過。你杜汶澤咁過癮嘅，你老婆喺大陸又有電視劇、又有廣告接，你杜汶澤仲可以喺度噏風噏濕、繼續發癲？」
杜汶澤喺facebook出咗個po（帖文）大大聲鬧嗰三隻嘢：「你三條死咖哩啡，比（俾）我見到你三個我唔打你老母臭×打×到你跪喺度求救我唔姓杜！我生平至×憎人屈×我！咁多人唔惹你走嚟惹我？仲要講埋我老婆？你未×死過！」
杜反駁選輸唔檢討仲賴人
廢陶暗指佢收錢做嘢，杜汶澤鬧鬼佢「死窮×」、「白癡腦」，永遠諗人哋收錢做嘢，「我唔係好×有錢，但係肯定有錢過你三個、加埋」，仲鬧埋反對派永遠諉過於人，唔識自我檢討，「所有『泛民』嘅支持者都畀（俾）你哋××走晒啦，仲要死不悔改就抵×你哋死！」最後佢更叫嗰三隻嘢快啲報定警啦，因為一定會打死佢哋。
杜汶澤嬲還嬲，但咁公開講到要打死人，似乎係刑事恐嚇嚟㗎喎？仲有，成個po都係「十八禁」，三句唔埋兩句問候令壽堂，真係好似周星馳喺《功夫》入面咁：你究竟想毆佢本人定毆佢老母啫？你搞到我好亂呀！
「無敵神駒」仇思達就留言戥杜汶澤唔抵，話對方明明無對選舉表達過咩意見，都仲要俾反對派清算，「『泛民』不知愧恥，毫不反省，還要諉過於人，兼砌生豬肉，發神經！」杜汶澤就繼續陶醉喺自己副身家度：「我一個月搵幾×多錢啊，我同你班×街走去爭嗰98,000（指立法會議員每月酬金，實為約96,000元）？」
工聯會立法會議員陸頌雄亦都出咗個花生po，幅圖仲好貼心咁用表情符號遮晒杜汶澤啲粗口𠻹（上圖）。 ■香港文匯報記者 陳庭佳