■林子健「被擄」後，在記者會上展示遭虐打和留在雙腳大腿上的21口釘書釘。 資料圖片民主黨「釘書健」（林子健）前年話自己喺旺角鬧市俾內地嘅「強力部門」派人「擄走」，當時民主黨班人即刻就幫佢搭咗台戲開埋記者會，李柱銘、何俊仁，同身為立法會議員嘅林卓廷就齊齊撐場，結果釘書健𠵱家因為件事要上庭，當日整齊嘅陣容就消失咗嘞，成日出風頭嘅林卓廷當然都冇影啦。有網民揶揄林卓廷係最佳政棍，當人係安全套用完即棄。
林子健被控喺2017年向警員虛報在油麻地被擄走一案噚日再度喺西九龍裁判法院開審。講緊上次開審嗰陣林卓廷就已經神隱，但估唔到呢次都繼續施展龜縮大法。事實上，喺林子健被踢爆懷疑講大話後，林卓廷就劃清界線唔肯再講呢單嘢。 梗係啦，冇政治油水抽之餘仲分分鐘燒埋自己，佢仲唔反轉豬肚唔認人？
見到林卓廷對自己嘅黨友咁有「義氣」，網民梗係都鬧爆佢啦。「Chi Kuen Stephen Cheng」就話：「政棍本色，一隻沒有利用價值的棋子還會望他一眼嗎？」「Tony Chan」恥笑：「有幾多人會將避孕套用二次？用完開心了便拋到垃圾桶裡了！」「Ka Wing Tong」就重提之前因為佢而衍生嘅退黨潮：「佢都俾黨友叫人格卑劣，仲講乜？」 ■香港文匯報記者 何西