鄭詩陶將趙家賢嘅「愚人節回覆」放上fb。 鄭詩陶fb截圖反對派近年積極「協調」選舉，但繼舊年兩壇立法會九龍西補選連環「屈基」，「協調」咗唔撐馮檢基，結果輸晒兩席後，𠵱家連區議會都要咁玩？話說黃大仙區議員譚香文有意捧自己個助理鄭詩陶出選黃大仙鳳凰選區，而鄭詩陶舊年亦都已經向「民主動力」召集人、民主黨趙家賢報名，但對方一直已讀不回，而民主黨今年初仲開始有人喺區內宣傳𠻹。事件日前俾媒體爆咗出嚟，趙家賢噚日先回鄭詩陶，仲話「民動」已經同7個區議員開過會，當中3個係民主黨人，大家一致支持由民主黨代表「發展鳳凰選區」喎，明晒。鄭詩陶就喺facebook貼咗坉茼^應出嚟話︰「愚人節收到沉默多時嘅『民主動力』召集人趙家賢博士『賜覆』真係別具意義。」
喺「飯民」大台下，個體戶真係好難撈㗎。黃大仙鳳凰選區個區議員係反對派嘅陳炎光，不過由於佢呃民政署津貼，舊年被法庭裁定欺詐罪成，仲俾個官鬧佢「詐騙公帑」、「砌詞狡辯」、「辜負市民期望」，坐咗2個月零3個星期監。雖然陳炎光仲符合參選條件，但想續任應該都難。
懶理譚香文推薦人
有見及此，譚香文舊年5月就向趙家賢推薦咗鄭詩陶去選呢個區，對方話會跟進，但又冇回音，鄭詩陶事隔半年後就自己再WhatsApp趙家賢講返件事，但對方已讀不回，似乎睬佢有味咁。不過，鄭詩陶都有繼續做佢嘅地區工作。而去到今年初，原本陳炎光嘅宣傳位就變咗民主黨嘅宣傳位，擺明已經指咗民主黨嘅人做宇宙唯一推薦候選人。
日前呢件事俾媒體爆咗出嚟，趙家賢先話自己「事忙」冇覆，回咗傳媒查詢，噚日先再補飛回返鄭詩陶，話就話係「道歉」，但第一句就綿裡藏針咁叫人「花少少時間了解當中的情況流程」。
佢聲稱，其實嗰區由民協施德來做聯絡人，即係唔關佢事咁話，然後再話當時陳炎光冇諗住退位，所以自己按機制只可以「提示」鄭詩陶有意發展喎。
趙家賢仲強調，陳炎光雖然有官司，但唔係嚴重違反民主理念。哦，原來佢哋民主理念係包埋呃津貼嘅欺詐罪嘅。
同區議員竟無份傾
趙家賢又聲稱，其實今年2月，7個「民主派議員」包括郭秀英、陳炎光、施德來、許錦成、胡志偉、沈運華、胡志健都一致認同由民主黨代表去「發展鳳凰選區」喎，而現任嘅陳炎光都係咁諗，所以就「尊重地區意見咁話」。睇真啲，7個議員最後3個都係民主黨嘅人，胡志偉仲係鴿黨主席𠻹，其他人點同佢玩呢？而明明都係黃大仙嘅「民主派議員」，譚香文就冇份開嗰個會嘞。
鄭詩陶收到咁嘅回覆，都喺fb度出post話︰「愚人節收到沉默多時嘅『民主動力』召集人趙家賢博士『賜覆』真係別具意義。」
有啲網民似乎戥佢唔抵，「Chiu Kai Wong」留言寸大台︰「公我贏字你輸。」「Chihung Lau」就叫鄭詩陶︰「做自己做到既（嘅）事！吾（唔）好理！」「Chris Ng」亦覺得唔使讓佢︰「照出，唔用『泛民』支旗。」
有啲網民都話，反對派口講民主，其實就親疏有別，「不是第一次，接受現實。」 ■香港文匯報 記者 甘瑜