喺香港發展農業已經唔容易，耕個田想協調吓用水都咁困難，就真係玩死啲真農夫。噚日facebook度有個叫黃零嘅農夫開地球post，點名立法會新界西議員朱隊友（朱凱廸）、「土地正義聯盟」同關心過菜園村嘅人，話菜園村復耕後有幾十戶人用水，佢個農莊就唔夠水用，希望有關方面聯絡返佢。點知朱隊友嘅豬隊友就上咗去鬧人，有人寸黃零個農莊唔係應該好慳水咩，又有人叫佢自己去同菜園村啲人傾，唔好「公開玩投訴」。朱隊友一開始覆網民話「唔夠水就叫水務署放水」，結果俾網民笑佢「鬥雞眼咪睇開啲」，拖到夜晚先貼個回覆出嚟「交功課」，但就從來冇打畀黃零溝通，搞到黃零氣憤大鬧朱隊友「呃選票」。■香港文匯報記者 甘瑜
「我地農莊」園主黃零噚日喺自己fb出post，話「菜園村復耕了。幾拾（十）戶用水，可以聯絡邊位啊！我地農莊快死了。天旱先來搶水。年年如是，點解唔做好水利先復耕。假農業玩死真農夫。」佢仲貼埋自己電話出嚟，希望會有人聯絡返自己。
不過，等咗成日主要都係啲網民關心佢，而朱隊友啲豬隊友更走去留言寸佢。其中，以環保人士自居嘅「日青」就快手留言寸黃零話︰「咩呀， 土木工程外判比（畀）一個顧問話『我地（農莊）』未來用噴灌好慳水架（㗎）。」
黃零就覆返話︰「菜園村連3月系（係）旱季都唔識。清潭年年旱季缺水，左膠玩農業，真搶水。我地（哋）可能過唔到呢闕（關）。唔再忍。」
「日青」就繼續寸嘴︰「我都唔知3月是旱季噢， 好似間唔中又落吓雨咁。」黃零忍唔住寸返佢︰「假農夫當然唔知。菜園村系（係）咪假農夫。朱凱廸有無用心了解農業。」網民「Dennis Cheung Manlung」亦幫口︰「落雨唔一定唔旱，最緊要睇地下儲水。」
除咗個「日青」，仲有個「Saufung Ng」批評黃零，話佢個農莊喺上游，下游嘅菜園村冇可能截到水，「不如你行過去直接問下村民和查勘下（吓），到底人地（哋）係用緊咩水，好過繞過咁大個圈係（喺）到（度）公開玩投訴啦。無水有一千種可能架（㗎）喎。朱生日理萬機都未必得閑（閒）理菜村啲水啦，不如靠自己去了解下，……行去問下有乜咁驚。」
黃零就話︰「同高春香（菜園村關注組主席）傾過好多次。菜村園（菜園村）復耕無負責人。」
「何不食肉糜」回覆震撼網民
雖然朱隊友啲豬隊友不斷寸黃零，但都有啲人真係幫手。「Lau Tin Wing」就將件事攞咗去pm朱隊友，結果獲回覆︰「如果不夠水，就要求水務處（署）放多些水。」唔少網民都俾呢種何不食肉糜嘅回覆所震撼，「Chris-A Hung」話︰「鬥雞眼咪睇開d（啲）囉。」
「Gloria Katze」就創作對話︰「病人：『醫生我透（唞）唔到氣呀』；醫生：『深呼吸咪得囉』。」
「賢匡 陳」就認為朱隊友有自己嘅邏輯︰「佢唔夠票，都係咁要求市民，然後做咗票王。」
仲有唔少網民怒tag（標註）朱隊友要求佢回應。「Cherry Chung」話︰「喂！ 你地（哋）斷人水源斷人衣食點解決呀？唔好扮盲拍拍籮柚走左（咗）去呀！我以元朗居民身分（份）質問緊你地（哋）呀！」
唔知係咪俾人追殺得多，朱隊友之後就留言貼返漁護署個回應嚟交功課，署方話會搵人清吓灌水道嘅雜草，同埋叫農戶一齊申請條大喉咁話。
蟲泰有打畀農夫 朱隊友無影
香港文匯報記者就打咗俾黃零了解情況，佢話連「熱血公民」個鄭松泰都有打畀佢，反而朱隊友就一直冇打電話。至於朱隊友份漁護署「功課」，黃零就話自己一早就知，但要搵政府就唔使搵議員啦，仲強調凡事都有程序，要先自己嘗試解決。
被批呃完選票唔做嘢
佢又話，雖然自己喺上游，但都想同菜園村一齊解決用水問題，而自己都好努力想搵菜園村班人傾，但菜園村幾十個散戶都唔知點傾，又冇人協調，質疑朱隊友藉菜園村事件上位，但呃完選票唔做嘢，狠批佢得個政治立場，工作能力極低咁話。