大家都見，今時今日「飯民」難撈，再無聊嘅一件事佢哋都要爭住做代表。話說全國政協副主席梁振英近日監察有咩人喺《蘋果日報》落廣告，呼籲社會唔好助長呢張報紙所煽動嘅歪風，但反對派就玩嘢話要眾籌喺上面賣廣告，用嚟落梁振英面，但未落到人面就先嚟一場內戰。「港獨」藝人杜汶澤噚日就出post恥笑社民連個吳文遠喺眾籌賣廣告件事上抄「100毛偽人」「東方昇」橋，吳文遠沉寂多時終於有得發圍，就寸返杜汶澤自己早過「東方昇」提呢個建議，仲話自己無法喺杜汶澤fb留言，叫大家幫手轉發，暗寸埋對方小器封鎖佢𠻹。「東方昇」就自己出post想幫吳文遠打圓場，點知網民留言話︰「唔好痴（黐）D（啲）政治乞兒咁多。」搞到吳文遠再中多幾槍。
杜汶澤寸吳文遠「抄人橋」
反對派一直狗咬狗骨，杜汶澤噚日就出咗個post，貼咗「東方昇」同吳文遠各自話要眾籌登廣告嘅圖出嚟，寸吳文遠「抄人橋改少少當自己諗」，仲話「這就是『泛民』」𠻹，完全毫不留情咁落佢面。
跟佢搵食嘅「盤菜盈子」柯翠婷當然緊跟老闆口徑，留言加把口兼上載吳文遠一張奔跑中嘅相，寸社民連心中只有「錢呀錢呀錢呀」。
「勇武前綫」亦轉發杜帖：「改下（吓）標題，改頭換面等二日都唔肯用下（吓）個腦，唉......社民連，不過長毛D（啲）靚（??）係咁上下水平啦！」
之不過，其實吳文遠真係早過「東方昇」諗到呢條橋㗎，仲喺上星期五貼咗出嚟，不過佢冇乜人氣，所以都冇乜人留意到啫。吳文遠眼見今次機會嚟啦，即刻寸爆出post，話杜汶澤有「少許誤會」，貼埋自己上星期五個post出嚟，然後話係咁啱「東方昇」前日都做咗呼籲啫，仲自抬身價話件事係「英雄所見略同」喎。
最後佢就括住一句︰「我無法在杜汶澤facebook留言，請各位朋友幫手轉發。」
「Dora Wong」就狠批杜汶澤：「杜汶澤唔知頭唔知路就出post鬧人，屈人抄橋，真係好離譜！如果佢仲有少少氣度，應該喺自己FB立即澄清，以免佢尐（啲）followers因為佢嘅言論怪錯人。」「Alex Wong」就寸嘴話：「杜生根本演藝圈垃圾， 無才無技無德無品， 只有女人運觀眾運， 呢啲人會道歉？」
杜汶澤就真係唔覺眼有再回應件事嘞，反而係「東方昇」似乎想打破呢種尷尬，咪出返個post幫吳文遠打圓場，話其實真係吳文遠諗到先，仲讚佢搞到有聲有色，所以自己就專心睇《蘋果》算嘞。
「東方昇」撲火再中多幾槍
不過，「東方昇」想幫吳文遠，網民就唔係咁諗囉。「Wingtatat Yee」就話︰「雖然你咁做好大方，但件事比（俾）政黨叫做騎劫咗，就令到件事有點批鬥成份（分）存在，而唔係真純嘅一次表態。你地（哋）自己搞眾籌我會夾錢，政黨搞我就表示：不了。」
「Louis Arsenal」亦話︰「政棍？不了。」「Ming To Chan」揶揄︰「吳文遠真心覺得係一單生意。」「Joey Yam」留言︰「如果係你攪（搞）個效果一定好好多，換左（咗）係佢就膠化左（咗）成件事。」
咁樣就中多幾槍，唔知吳文遠會唔會覺得俾「東方昇」捧殺呢？ ■香港文匯報記者 甘瑜