■買位落廣告都幫唔到長毛洗底，唔知佢仲有咩打算呢？ 網上截圖要幾睇唔開先會去捧個連「飯民」都想放棄嘅政圈人物？話說社民連「長毛」梁國雄之前同年輕網民鬧交，仲鬧出「我×你班蛤蟆呀！你有票？我唔要呀！」「除咗喺呢度打×機之外，你班蛤蟆仲識做乜？」嘅金句，咁就同埋「飯民」連輸兩次立法會補選個勢一齊插水，「飯民」大台仲一度開聲唔想畀長毛選𠻹。唔知係咪因為咁，最近網上時不時就有啲長毛嘅吹水宣傳，講到佢好有堅持、好偉大咁，嚟緊仲有套關於佢嘅劇上𠻹。之不過，網民都唔係咁易氹，好多人起勢喺嗰啲post度留返長毛嘅金句去潤佢，想重建形象，睇怕都比想像中難嘞。
話說舊年11月立法會九龍西補選期間，待業長毛成日都喺網上同年輕網民鬧交，除咗用上述兩句金句鬧人，幫工黨李呃人（李卓人）趕客之外，其後「飯民」正式輸埋，大家都想扮尊重「本土派」意見時，長毛繼續發功話「唔想道歉」，仲寸班「焦土派」：「覺得輸咗個選舉仲好嘅，咁我有咩辦法？」鬧網民之餘，長毛仲鬧埋自己人，曾經喺網台節目勸長毛唔好再「×票」嘅「社區前進」成員林兆彬，就俾對方on air（直播）狂鬧成6分鐘，其間林兆彬成隻鵪鶉咁，都咪話唔陰功。
網民回帶趕客金句
呢啲精彩言論同畫面仲咁記憶猶新，要洗底真係好有難度，但偏偏呢個世界就係有勇者。有個叫做「一條褲製作」嘅劇團嚟緊就會做一套《一個人的政治：長毛》嘅劇，雖然劇團方面都戴咗頭盔話「無意造神立傳」，只係想講佢哋眼中嘅長毛，但都引嚟唔少人寸爆留言。
唔少人都各自講返自己眼中嘅長毛出嚟，包括貼返長毛句「我×你班蛤蟆呀！你有票？我唔要呀！」嘅金句圖，亦有人係咁講「入錢，入錢，入錢」。
仲有啲鬧得勁啲嘅，就俾劇團刪咗。「一條褲製作」話︰「由於部分回應內容涉及粗言穢語，作出人身攻擊及侮辱性言論 ，因此相關回應已被刪除。請各位互相尊重，作理性交流及討論。」「Herman Kwok」就精警回憶起長毛成日爆粗侮辱人︰「甘（咁）係咪要刪埋主角？」
「黃媒」硬銷惹人厭
《立場新聞》上都有人買位唱好長毛同宣傳呢套劇，不外乎都係講下佢有堅持、有理念，總之就有「個人政治魅力」啦。「Alfred Chum」留言話︰「真係識嘅笑死、唔識嘅嚇死。」「Adam Leung」就好努力咁引述文章重點話︰「本文為贊助內容。」「Jeff Li」就似乎俾呢啲廣告煩親︰「點呀？講佢既（嘅）舞台劇果（嗰）套票房係咪好告急呀？ 成日宣傳呢個今日只係識叫人入錢，×票，亂咁鬧人嘅過氣老人做乜×野（嘢）呀？」 ■香港文匯報記者 甘瑜