■一出嚟搞事就被CY捉到破綻，真係檢討吓啦大將軍。fb截圖惡搞人哋結果搞着自己，除咗現眼報都諗唔到更貼切嘅形容。社民連主席吳文遠日前喺《蘋果日報》登頭版廣告惡搞梁振英（CY），話就話同《蘋果》法律部商量過，但結果就俾人捉到佢個廣告聲稱係由「香港人忍耐力有限公司」贊助刊登，而其實香港就「有限公司」稱謂嘅使用係有法例規定嘅。CY噚日就表示佢個律師已經舉報咗有關人等涉嫌觸犯相關法律，唔少人都恥笑吳文遠「捉蟲入屎忽」，揶揄佢呢頭籌完錢登廣告，嗰頭又可以籌錢畀自己打官司啦。
玩嘢玩得高明，有時真係冇佢符，但如果自己有痛腳外露，俾人捉到真係唔怪得人。話說CY近日積極監察有咩商戶喺《蘋果》落廣告，呼籲社會唔好助長歪風。吳文遠唔抵得CY咁樣監察法，於是懶有趣咁眾籌賣廣告惡搞對方，點知當日就俾CY四両撥千斤咁多謝佢幫手宣傳，轉個頭仲有法律界人士同CY講，個廣告聲稱由「香港人忍耐力有限公司」贊助刊登，但嗰間公司似乎係冇正式註冊，咁就涉嫌觸犯《公司條例》嘞。而吳文遠同《蘋果》當日都迴避呢個法律問題冇澄清。
唔少人當時都支持CY告吳文遠班人，結果噚日CY就喺facebook出post，話佢個委託律師已經查明冇呢間公司，「就此虛假陳述，我委託的律師已經舉報有關人等涉嫌觸犯相關法律。」
正反兩方齊恥笑吳捉蟲
一眾CY支持者就留言叫好。「Stephen Kwan Hing Lee」話︰「好！梁先生，做得好！我撐你！」「Simon Pun」表示︰「要為佢哋小學雞做法付出代價。」有啲人就恥笑吳文遠同《蘋果》。「Lau Chak Ming」揶揄︰「就這種智商也能存活這麼久。」「劉瑞潮」話︰「咁大間『全霉（傳媒）機構』，都犯咗咁低級錯誤。」
唔止CY支持者，反對派方面都有唔少人恥笑吳文遠。電台DJ「健吾」轉載CY個post話︰「政治人，唔好學你哋睇唔起嘅KOL。我講過好×多次。」「Earnest To」亦喺「健吾」個post度留言︰「支持CY！告到班友甩褲！」
「Vienn Leung」反諷吳文遠︰「『泛民』好威威呀，落晒CY面呀，CY好無聊呀！今日係香港民主最光明既（嘅）一天！聽日一定會更加好架（㗎）姐（啫），你話係咪呀吳文遠？」「Marvin Ng」就直接咁話︰「×......咁都比（俾）CY捉到。」「Siu Ming」亦話︰「比（俾）人當狗咁×。」「Wing NG」表示︰「除左（咗）抵死都唔知可以講乜。」
「Marco Ming」寸吳文遠︰「又可以搞眾籌啦（打官司）。」「Ga Gor Gi」繼續抽擊︰「『行人路大將軍』（吳文遠）為左（咗）錢乜野（嘢）苦肉計都諗得出，先籌募十六萬（『社氓連』會抽手續費）落廣告，然後令自己官司纏身再籌一筆去打官司。」「Derek Pak Lun Ip」就好有幽默感咁引用民主黨黃碧雲嘅言論︰「好彩有告你咋。」
吳文遠就死撐出post扮冇嘢，話CY係「小氣（器）鬼」，「都唔知點樣應酬佢好」喎，仲叫擔心佢有事嘅人唔好跟車太貼添。咁又係，自己先啱啱慘痛「車禍」，其他人都真係要睇住啊。 ■香港文匯報記者 甘瑜