■CY再追擊吳文遠。 梁振英fb截圖整一個純粹自high嘅惡搞廣告，分分鐘惹兩單官司上身，值得咩？社民連主席吳文遠呢幾日因為惡搞梁振英（CY）個廣告，先被CY質疑佢違反《公司條例》，噚日CY再出post追擊，質疑吳文遠眾籌登廣告一事涉及詐騙，直言如果報警嘅話就係第二單官司。唔少網民都覺得CY「3：0」吳文遠，支持送佢入冊。咁多年嚟，議席撈唔到，官司就有幾單嘅吳文遠，似乎都慣晒俾人告上法庭，口響響咁叫CY「快啲報警」喎。
CY為咗杯葛接連發表冷血言論嘅《蘋果日報》，近期積極監察喺《蘋果》落廣告嘅商戶。郁到反對派嘅金主，唔少人都開始做嘢，其中吳文遠就搞咗個眾籌，喺《蘋果》落頭版廣告想奚落CY，點知俾CY連入3球。
首先喺廣告面世嗰日，CY就大方回應話多謝吳文遠幫手宣傳監察行動，俾網民形容為CY「1：0」吳文遠；其後CY又入多球，質疑佢個廣告聲稱由「香港人忍耐力有限公司」贊助刊登，但呢間公司根本唔存在，CY個律師已經舉報咗件事。
噚日CY又出post，話有朋友參加吳文遠嘅眾籌，當時相信吳文遠嘅講法，認為啲錢係用嚟賣廣告。結果個《蘋果》廣告，並唔係用吳文遠或吳文遠所屬嘅社民連所刊登，「而在《蘋果日報》刊登廣告的『香港人忍耐力有限公司』並不存在，因此沒有任何事實可以說明吳文遠和這『有限公司』的關係。」
不交代款項去向可被控
CY話，佢個朋友質疑眾籌款項去向，要求吳文遠公開登廣告嘅收據，「否則這次眾籌就可能是詐騙，可以報警，這將是第二單官司。」
唔少網民都留言或轉載支持CY。「Yang Chun Yu」表示︰「吳文遠非法眾籌，一定要交代清楚費用去向。」「Hideto O'Mazi Kanzaki」恥笑吳文遠︰「吳生搞左（咗）幾日又要同律師團傾又要搵埋編輯度晒計，就係得咁多。連笑×人都笑到自己成褲屎，仲學人玩政治，返去執屎啦，咪再晒（嘥）人錢好嗎？」
有啲人就嘗試幫吳文遠撐，質疑CY嘅「朋友」又點會損錢畀吳文遠登廣告，「Tak Kong Lou」就話︰「臥底都算係朋友，明白未？」「Sunny Hung」亦話︰「捐1蚊然後告佢。」
吳貼「有限公司」收據死撐
吳文遠聲稱，自己冇咩好回應，口響響咁叫CY「快啲報警」。雖然扮晒冇所謂，但搞咗幾日幾夜，佢前晚終於貼咗張「香港人忍耐力有限公司」捐款嘅收據出嚟，話自己個廣告係「事實陳述」喎，睇嚟以後做「有限公司」登記，搵吳文遠捐錢咪得囉。 ■香港文匯報記者 甘瑜