梁振輝 香港資深出版人
輝仔、婷婷和為為在茶房正談論着某件事情。
婷婷：「大近視」（大件事）嘑，你兩個知唔知琴晚K仔入咗「ICU」（急症室）呀！
為為：琴晚已經「收到風」（收到消息）喇，話佢踢踢下波暈咗「響恕」（在那處），而家仲昏迷緊呀！
輝仔：唉，睇勻成間公司，至「fit」（狀態佳）都算係佢；搞單咁嘢，真係勢估唔到！
婷婷：聽院方講，佢原來係有「隱性心臟病」！
為為：「巧」（好）擔心呀！又擔心佢有事，又擔心自己學佢咁身體出咗問題都唔知！
輝仔：「吉人自有天相」喎，要擔心都擔心唔嚟！
婷婷：唔係發生喺你身上，就梗係冇有擔心喇！
在各人憂心忡忡之際，經理剛巧經過。
經理：講緊K仔呢！老老實實，佢有我哋香港咁高質素嘅醫療團隊睇住，我唔擔心，我擔心嘅反而係佢跟開嗰個大「project」（項目）點收科！
輝仔：話晒我哋同埋一個「team」（團隊），有乜嘢梗係「夾手夾腳」搞掂佢喇！包響我哋身上！
經理：講得好，咁就睇你哋嘞！嗱，輝仔，就由你做總其成，聽朝交個「plan」（計劃）嚟參詳下！
輝仔：經理，「夾計」呢家嘢，係我哋強項，包冇「甩轆」（失誤）㗎！
經理隨後離開公司。
婷婷：輝仔，你就講得「口響」（誇口），我哋幾個「夾慣夾熟」又話啫，你唔好忘記個「team」仲有肥榮喺度，佢一向獨斷獨行，我擔心......
為為：「夾band」？我肯定肥榮同我哋「唔夾」......
說到這裡，肥榮突然出現。
肥榮（不悅口吻）：講我乜嘢「唔夾」呀？
婷婷：冇冇冇，你知K仔「入廠」（入院）嗰單嘢㗎喇，大家傾緊「夾錢」買紮花去探佢，咪講到唔知你會唔會同我哋「夾份」啫！
肥榮：講真，我同你哋係「唔夾」嘅；不過如果淨係講送花，「唔夾」都幾煩，咁就「夾番份」喇！
上期講到，「夾」在粵方言中也有「合」的意思；加上「合」有「集合」的意思，所以「夾」也有這個意思；「份」即「份額」，指在總份數中的一定比例，那廣東人口中的「夾錢」、「夾份」就分別有合資和按份額合資的意思。如有人說「夾番份」或「夾番一份」，他/她表示預算投資或分擔某個合資項目的一定份額。
要理解「夾計」（「計」多讀成「偈/計3-2」），讀者可從「合計」一詞中窺探。「合計」有合起來計算和共同商議的意思；前者與「計算」有關，後者則與「計謀」有關；「夾計」的性質屬後者，而此詞多指串通或同謀。
「合」有「合作」的意思，所以廣東人說的「夾慣夾熟」就有「『合』作『慣』，『合』作『熟』」的意思，即在經常合作的基礎上，合夥人易於溝通，因而合作暢順、愉快。
「合手」，亦作「合掌」、「合十」，指兩手相合，表示尊敬，也是一種佛教儀式。除此意思外，「合手」也指同心協力。詞彙中，「手」和「腳」很多時都會連用；就在此意念上，聯想力豐富的廣東人創造了「合腳」，那「合手合腳」和「夾手夾腳」就有同心協力的意思了。
「合」有組、合組的意思。香港人叫「合組」樂隊做「夾band」（一起「打band」）。對「band友」（樂隊成員）來說，「夾band」不只因有共同興趣而走在一起，還潛藏着一份深厚的情誼。及後，人們也會用「夾band」來表示二人或多人作緊密合作。話說回來，不少「band友」在「散band」（解散）多年後，仍不時聚首話舊甚或再度合作，足證這份情誼經得起時間的考驗，無怪人們形容友情匪淺做：
Friend過打Band
意指較「打Band/夾band」的還要友好。
「唔夾」，可用以表示「唔夾錢」；在一般情況下多指「不合」、「不合攏」、「不合拍」、「不協調」、「不融洽」、「不和諧」、「不投契」，有「合不來」的意思。同某某「唔夾」，廣東人也會說：
夾唔嚟、夾唔埋
以下用語也有「唔夾」的意思：
唔咬弦、唔啱牙、唔啱key
「弦」，讀「然」，指弦線。「唔咬弦」原指演奏二胡等拉絃樂器時弓不咬弦，即拉時弓在弦上打滑，後引申為合不來。「啱」，讀「aam1」/「岩4-1/ngaam1」，有配合之意。「螺母」（nut）與「螺釘」（俗稱「螺絲」，bolt）配合使用時，起了連接緊固機件作用；完全配合時稱「啱牙」，其中「牙」讀「牙4-2」。人們借「唔啱牙」比喻合不來。「key 」指音樂中的調；「唔啱key」就是不合乎節拍，引申為不合拍。近年，人們多會把「唔夾」說成：
唔啱嘴型、唔啱feel、唔啱channel
「啱嘴型」指口型相配合；「唔啱嘴型」引申為不合拍。「feel」指「feeling」（感覺）；「唔啱feel」指心意不相通，難以情投意合。「channel」指廣播中的頻道。「唔啱channel」就是雙方不愛收聽或收看相同的頻道，引申為不投契。