■左起：季軍古佩玲、冠軍黃嘉雯、亞軍王菲及友誼小姐陳熙蕊會見新聞界。香港文匯報訊（記者 梁靜儀）四位港姐得獎佳麗，冠軍黃嘉雯、亞軍兼最上鏡小姐王菲、季軍古佩玲及友誼小姐陳熙蕊，昨日到將軍澳電視城會見新聞界，四人都略現疲態。黃嘉雯表示可能睡眠不足有點作病：「比賽完只睡了四個鐘，而比賽前一晚就瞓得三個鐘，加上一選完就放鬆，想病、頭赤赤，今日（昨日）應該會早放返去休息，（唔同外籍男友慶祝？）唔知呀，我𠵱家只係想睡覺，佢都要返工。（當晚男友唔下來接你返上樓？）我哋唔喺一齊住，當選之後佢有Send Message畀我話『Proud of me』。」她透露回家後跟家人開香檳食外賣宵夜傾偈慶祝。說到過往有多位港姐當選後，都因工作繁忙忽略另一半，而走向分手之路，問到可會怕中「港姐魔咒」？她說：「唔會，男友好大方，大家都係成年人好成熟，我好有信心，佢好明白、支持我。（當選之後有冇約法三章？）冇，我們好Free，都一齊年幾。（如果之後拍劇要有親密舉動，男友可會OK？）未諗到咁長遠。（會限制你？）冇傾過呢方面。」至於她亦對從事Marketing 的男友信心十足，不怕男友約會其他女仔。黃嘉雯透露之後會約齊所有佳麗一齊打邊爐慶祝，因為最近忙到沒胃口。雖然之後要再選華姐，但她笑言食了再算。
王菲收海量祝賀訊息
王菲表示當選後也睡不着，因收到朋友海量的祝賀訊息，又要翻睇比賽，睇到自己個妝溶掉，朋友都有截圖給她，但不是取笑她，她笑說：「如果有自己動態圖都幾好呀。」成為雙料亞軍，王菲表示感覺很不真實，又好突然，每個環節都驚被淘汰出局，行到這一步已超額完成，表現比想像中好，但返到屋企食完湯丸就嘔吐，可能是傷風加上賽前只吃了兩條菜，餓得太久。
身旁的古佩玲亦表示當選後心情激動至睡不着，感受跟王菲一樣，她又同樣是吃湯丸及有點鼻塞。問到男友跟她怎樣慶祝？初時不欲提起男友的她，後來才表示男友身在加拿大，但也有發短訊恭喜及給她心心。相比下王菲則大方得多，承認已有一名拍拖三年的男友，並透露得獎後男友也有恭喜她及讚她叻女，但就要待忙完才可慶祝。她指男友當晚在家中跟家人睇電視支持她，問到可擔心當選後工作忙令感情有變？王菲有信心情不變：「唔驚，之前忙到冇覆男友WhatsApp，佢都體諒，同好支持我，我有信心。」