大台呻窮話律師費貴唔夠分 被質疑「法律支援」藉機發財
大台成日叫人捐錢就咩法寶都盡出，啱啱嗰個星期日籌款時仲播埋《願榮光歸香港》呢啲「港獨」歌，但要使錢落所謂「義士」度時，就開始斤斤計較。日前，有「女義士」踢爆「612人道支援基金」唔人道，唔肯批錢畀佢請律師，令到佢要棄用原本律師團隊，改用法援素未謀面嘅律師。可能俾人鬧得太犀利，「612」前晚跳出嚟同大家「計數」，話如果個個都要用自己嘅首選律師，基金好快乾塘，所以大家要先申請法援。有網民反問，點解前線「手足」無償付出，但啲「義務律師」唔收順啲。喂阿哥，佢哋唔賺被告錢賺邊個錢啫！■香港文匯報記者 黃書蘭
籌完9,000幾萬做「人道支援」，但結果叫人「申請法援」，唔「關公」災難就奇。「612」前日再喺facebook解畫，話有成500幾人被告暴動，如果每人要180萬去打官司，支援大概30人就會乾塘，所以如果大家唔想籌夠9億嘅話，「手足」一定要先申請法援（下圖）。
至於「612」嘅角色， 就係喺「裁判法院階段」最多每日資助1.2萬畀啲被告請律師，喺區域法院、高院或上訴時去為成功申請法援者提供「法援分擔費」，或者幫申請唔到法援嘅人畀返法援水平嘅律師費用咁話。
打官司開價180萬都算「義務」？
啲黃絲熱情捐款，都冇諗過「612」又要揀case、又要畀「最低工資」人㗎嘛，於是網上又罵聲一片。「熱狗」副主席鄭錦滿就留言質問：「『前線手足』無償付出自由，律師反而要收足費用？唔係『義務律師』嗎？」「熱狗」馬啟聰亦質問班黃色律師點解好意思收人一個case 180萬，「你如果係諗住當正做生意嘅話，你早啲講明吖嘛，扮乜嘢『人道支援』啫。」
原名葉鍵濠嘅商業電台節目主持健吾又諗唔明點解大台永遠慳「義士」，唔去慳律師，「『義士』係免費，法律專業就要收錢。呢點我係諗唔通嘅。」
譚香文叫民陣「星火」公開賬目
身為同路人嘅黃大仙區議員譚香文都開post批評，仲辣埋永遠唔公開籌到幾多、用咗幾多錢嘅「星火同盟」︰「『612』同『星火』呢兩個基金收咗過億捐款，但到前線『手足』要打官司、法律支援既（嘅）時候就叫人申請法援，係咪呃錢？」佢仲挑機叫「612」同「星火」畀盤數獨立專業人士睇，身為會計師嘅吤繨雃菑v可以分文不收咁幫手𠻹。
唔少網民都有類似睇法，「Terry Wong」問：「點解要一百八十萬，『泛民』律師唔可以收平啲？」「Victor Lau」亦問：「公民黨班大狀可否義務協助呀？佢哋唔係想賺呢啲錢呀？」
「泛民」咁多大狀點解唔義助？
「Joe Tse」直言：「大狀單單一百幾十（萬），而大家捐錢既（嘅）好多係連樓都無。」「Phoebe Wong」道：「既然個個都靠法援，咁不如『612』直接拎返市民支援『抗爭者』果（嗰）一億出嚟，分返俾（畀）被告嘅『抗爭者』，等佢地（哋）自己決定做安家費定俾（畀）錢搵個令自己安心嘅律師打官司啦，至少大家知D（啲）錢真係幫到『抗爭者』，而唔係市民捐錢幫班『泛民』律師發國難財，買多兩層樓囉。」
「Phoebe Wong」仲話︰「『612』寧願花D（啲）錢係（喺）個用一次嘅遊行音響到（度），都唔肯用係（喺）個為香港付出所有，只求唔使轉律師，可以用返令自己安心一點嘅律師嘅condom（避孕套）『抗爭者』身上，仲（話）『手足』喎！」