每當所謂「勇武」黑衣魔做嘅嘢過晒火時，班「和理非」為咗包庇暴行、煽動仇警，就乜都推喺警察身上。有所謂「屠龍小隊」成員俾警察搜到有槍有子彈，有黑衣魔縱火燒法院，泛暴派中人就即刻幫黑衣魔兜，話「有傳言」講係「警察做」咁話，包庇黑衣魔包庇到出面。不過，有自知呢啲嘢確係「自己人」做嘅「勇武派」就唔係好領情，反而覺得「和理非」咁樣做係割席，將佢當做「避孕套」。有人更靈魂拷問︰「又話不割席嘅？不過唔緊要啦，有起事上嚟，你呢啲尊貴嘅區議員會走先㗎嘛，係咪？」
撐魔者不滿「和理非」抹煞「功績」
黑衣魔藏真槍想製造混亂、縱火燒法院等等，都引起社會各界批評，一直聲稱不割席嘅泛暴派即刻幫黑魔轉移視線，斯文啲嘅話唔知邊個做，野蠻啲嘅就明示暗示係「臥底警察」放火喎。其中，啱啱當選區議員嘅民陣召集人岑子杰對燒法院呢件事，就話邊個講過「警察捉人，法官放人」先最有嫌疑，成班「勇武放火」嘅「手足」咁就被逐出家門啦。
有大台領袖發話，唔少人都好似見到救生圈咁雙眼發光。「Lufsig Lee」附和︰「『黑警』又嫁禍畀示威者。」「Lotso Finley」直情鬧「手足」低能︰「燒終審法院，諗出嚟嗰個都低能嘅，做嗰個更加唔使講，咁幼稚嘅嘢只有呃OT嗰班人（暗指警察）先做得出囉！」
「獨人」聲稱燒法院「好溫和」
雖然有啲人一副「反正我信了」嘅態度，但都有唔少人都好清楚呢件事分明係「手足」所為，對「和理非」抹煞佢哋嘅「功績」好唔like。
走咗佬嘅「港獨」分子楊逸朗，就聲稱「『黑警死全家、死黑警、血債血償』原來唔係真係想佢哋死㗎？鬧吓㗎咋？......割蓆（席）譴責藏槍殺警、火燒法庭嘅人，撫心自問自己到底咁多個月嚟有冇諗過方法，如何對抗黑警荷槍實彈嘅暴力鎮壓、如何拯救被法律誣告陷害嘅年輕手足！......而唔係躲喺最安全位置上捉鬼×狗。」
「港獨」分子梁頌恆亦發帖質問：「有兄弟真的拿出了槍/其他法寶去反抗去保護你/其它（他）人的時候，你又準備好支持他了嗎？......『不割??（席）』三個字，說出來可能很簡單也最有效，卻知易行難。......有人希望搞法院又有什麼稀奇的？」
「港獨」分子劉穎匡則出post話︰「喺非辦公時間燒法院，相比起其他『勇武抗爭』方式，已經係『好溫和』。」佢分析話，燒法院相比私刑冇人受傷、相比「裝修」中資店舖冇乜財物損失、相比搞港鐵等「冇咁擾民」，「我實在睇唔到任何理由要同『更加溫和』嘅燒法院割蓆（席）。兄弟爬山，各有各做，講好咗核彈都唔割。」
被回帶叫有事「議員先走」
「Terry Tsang」就揶揄岑子杰︰「咁快割，真係畀（俾）佢哋勝出後就清算返自己人轉頭。」「Andrew Hung」就回帶岑子杰喺遊行前嘅記者會上，曾大大聲咁話如果警方要提早結束遊行，候任區議員應該「先行離開」，於是就揶揄話︰「又話不割席嘅？不過唔緊要啦，有起事上嚟，你呢啲尊貴嘅區議員會走先㗎嘛，係咪？」 ■香港文匯報記者 甘瑜
