煽搞破壞被踢爆仍死撐 同路人無視侵權續支持
喺呢半年暴力示威現場時常現身甚至被視為「卡通形象」之一嘅Pepe the Frog，畀好多「黃店」謀咗好大利益。為咗爭食呢塊人血饅頭，佢哋嘅食相十分難睇。早前靠販賣Pepe「發大財」、經常話自己支援抗爭嘅樂文文具公司，就喺網上死咬本月開張嘅首間Pepe期間限定店產品係「抄襲」、「目標係吸血」，稱自己嘅產品先有香港代理授權，又引述網媒報道話間店「有中資背景」，搞到同路人要罷買甚至「裝修」。有撐暴嘅「獨立記者」查證件事，發現嗰間限定店先係香港獨家代理，但樂文推三阻四唔肯認錯，最後喺記者威脅如果佢哋唔認錯就會再爆料的情況下先跪低。不過，個記者都係明踩實幫呢間佢「有兄弟識」嘅樂文，大張旗鼓找尋到「真相」後竟然唔係叫人支持正版，而係兩邊都要支持，真係一齣大戲換來名利雙收呢。 ■香港文匯報記者 文根茂
漫畫家Matt Furie創作嘅Pepe，喺香港大街小巷都好容易見到，好多「黃絲」當佢係「抗爭符號」，於是就有眾多「黃店」想爭食呢個人血饅頭，販賣其周邊產品。
屈正品店「中資背景」遭調查
今個月中環出現全港首間期間限定Pepe the Frog Store，販賣Pepe周邊產品，引來滿城風雨。有媒體聲稱一間有內地背景的企業Momo Entertainment正為Pepe青蛙頭像申請註冊商標，涉及的頭像圖案，出現在中環限定店內的產品上，因此懷疑間舖有「中資背景」。
同樣販賣Pepe周邊產品嘅樂文文具公司就引述呢篇報道，仲聲稱網民可以就Pepe版權問題向海關查詢，即係叫人報串，又稱自己販賣嘅產品係「香港代理授權」，更直指中環間店食「人血饅頭」、「目標就是吸血」，產品都係「抄襲」。「黃絲」神經很快被觸動，開始造謠話間公司係內地企業運營、有間喺深圳嘅公司，各個都話要「罷買」、甚至「裝修」，亦真係有黑衣人開始喺間舖附近騷擾顧客。
但一直撐暴、聲稱係「獨立記者」嘅「白影」日前就帶同律師查證件事，在翻查公司註冊文件後證實間公司確喺香港註冊，且佢哋先係買下Pepe香港獨家代理權嘅公司。原來侵權嗰個係樂文文具公司至真囉！
「黃絲」瘋傳嘅深圳間屬於佢哋嘅公司，都係捕風捉影的謠言。根據「白影」嘅調查，至於內地背景企業申請註冊商標，則係由真正的版權持有人或其帶包申請，根據香港法例，呢間中環嘅公司只係Sub license，無法由佢哋申請。
遭「手足」通牒終跪低道歉
面對自己手足查出嘅「真相」，樂文文具公司都係五次三番推卸責任，先係話「很多網民都有轉發」、「自己並非唯一有轉帖嘅人」，之後又開post鬧返啲質疑者：「放回焦點去件事啦！好心提！重（仲）玩抹黑，說好的不割不化？」更企圖捐出100個帆布袋收益等息事寧人。
不過，已經高調宣揚調查「真相」嘅「白影」唔會就此罷休，佢就喺post話自己都以「手足身份」「教埋你地（哋）應該點做，甚至教埋應該點答我作為記者時的提問」，又無奈指「唔係因為我有兄弟識你地（哋），我先唔會咁做」。最終就威脅稱「以手足身份比（畀）你地（哋）既（嘅）最後通牒！收回言論，認自己收錯料，咬錯人。否則我再爆埋我手上有既（嘅）料，你入左（咗）既（嘅）大量貨，唔止會無人買，我擔心係你地（哋）被裝修。」
如果睇到呢度覺得呢位記者係想支持公義保護正版你就太天真。收到呢個「通牒」後，樂文文具公司即刻發道歉信，而「白影」都態度180度大轉彎，話叫「大家收貨」、「已造成的傷害是無法完全修復的了」、「賺錢係天經地義既（嘅）事，仲要大大力去賺」，無視「手足」侵權，話「咁兩邊我都會買隻」。最終，不單止自己因為「追求真相好公道」而出名，自己兄弟嘅舖都唔會因為抹黑同行而受到懲罰，呢招真係好高。