■「小黃書」低價招聘「手足」被批。 fb截圖都話「黃絲」一爭利益就會分化。一班「黃絲」成立咗一本叫「香港人的小黃書」嘅所謂雜誌，日前喺facebook發出招聘啟事，開出一堆職位話會優先考慮「有財務困難」嘅「手足」，例如請「製圖師」每個post連圖有5蚊人工咁多，「寫作大師」就每個字值3毫，仲要被採納先有得拎錢，令到班「手足」大鬧佢哋食人血饅頭。「小黃書」方面就否認，話自己出錢係想「手足」「有回報」，但結果雙方都係嘈到拆天。
一直煽暴嘅商台節目主持潘小濤強力推薦嘅「小黃書」本月問世，不過引起廣泛轟動嘅就唔係佢哋嘅刊物內容，而係佢哋請「財困手足」嘅招聘啟事。
「小黃書」日前喺facebook發出招聘廣告，邀請「有理想有信念的手足」應徵4個職位，每個職位都有數項唔低嘅入職要求，並且喺每個職位要求都特別列明「有財務困難者優先考慮」，不過開畀所謂「隱世排版及美術大師」、「Social Media（社交媒體）發文及IG製圖師」、「被埋沒的寫作大師」嘅人工就分別係「封面及封底：$350、內頁每頁：$150」、「每個post連圖：$5」、「按字數：$0.3」咁多，仲要被採納先有得拎，而「助人為樂有教無類總編輯」就完全冇薪水，淨係提供「食得飽饍（膳）食，出入交通費」添。
網民斥「當設計師乞兒」
啲「手足」就即刻鬧爆佢哋，「Calvin Wong」話：「人血饅頭唔×係咁食啊？」「Rabeea Yeung」就反問︰「哇你當designer（設計師）乞衣（兒）呀？」「Angel Choi」就覺得呢個價錢係侮辱緊設計師嘅尊嚴。
不過「小黃書」都「據理力爭」話︰「我哋手頭有既（嘅）錢有限，但為左（咗）貫切（徹）理念我哋希望『手足們』都會因為佢哋既（嘅）付出收到回報同埋幫生活有困難嘅『手足』，先有呢個『人工』機制」，又話「『小黃書』手頭既（嘅）錢係幾位兄弟自己集資攞出嚟」，「人血饅頭呢四個字我哋真係受唔起，至少人血到不停燒自己錢我都係第一次見。」
不過，呢堆說話就再次激起「黃絲」怒氣。「吳十三」反駁︰「你自己燒錢，就要其他designer陪你一齊燒錢？呢個係乜嘢玩法？」「Yenkie Tang」就寸佢呃人︰「如果根本就攞唔出錢去請人嘅，咪一開波就開門見山直接講我冇錢」，又揶揄佢哋「收到你個$5真係皇恩浩蕩要謝主隆恩。」「何珈蔚」都覺得佢哋好肉酸，一針見血咁話︰「你又要幫助財困『手足』又要壓榨佢哋。」
■香港文匯報記者 郭家好
