■「獨」講師劉正不滿潘任惠珍，在fb發帖鬧爆。 fb截圖食人血饅頭都要有回饋先得㗎。一班「黃絲」前晚喺九龍灣德福廣場搞「和你Shop」活動，之前獲「民主動力」推薦嘅現任及候任德福選區區議員潘任惠珍被市民質疑，點解佢無制止警察「胡亂」進入商場執法，潘任惠珍就話自己只係一個區議員，無權阻止警方，只會喺區議會發表意見。呢件事就引起中大「獨」講師劉正不滿，喺伭acebook專頁「無神論者的巴別塔」上演一場鬼打鬼，開post鬧爆潘任惠珍︰「永遠唔會見倒（到）佢響前線出現；然後而（??）家『差佬』收工，佢就出黎（嚟）攞尾彩，比（俾）人×亦係人之常情。」
「獨師」：現場出事你死你事
劉正喺fb度轉載當晚一條即時新聞，內容係「現任及候任德福選區區議員潘任惠珍與市民爭執。在場市民質疑為何沒有制止警察『胡亂』進入商場執法，潘任惠珍則表示她只是一個區議員，沒有權力阻止警方，並表示自己是一個『和理非非』，只會在區議會發表意見。」
劉正就話，潘任惠珍係「民主動力」推薦名單之一，即係「飯民主派」啦，「兩個禮拜黎（嚟）德福打×咗幾次，你永遠唔會見倒（到）佢響前線出現；然後而（??）家『差佬』收工，佢就出黎（嚟）攞尾彩，比（俾）人×亦係人之常情。」佢又寸潘任惠珍︰「當選前講到自己點為市民做實事，當選後而（??）家就同你講佢係『和理非非』，只會響區議會表達意見，現場出事就你死你事，變相承認『區議員就係無×用』。」
不過，都有人撐潘任惠珍「和理非非」嘅，「Alex Leung」問：「佢講嘅野（嘢）有咩錯？區議員有權阻止警方執法咩？」劉正就回覆話︰「無錯，所以成晚打到×街，區議員大條道理唔出現，臨尾先出黎（嚟）抽抽水話會響區議會反映件事？『黃屍狗』咁都仲想屎中尋豆係咁兜，究竟有幾無恥？」劉正又補刀話︰「原來區議員求×其其響區議會表個態就收貨，當初就咪×同我講區議會選舉好×重要。」
亦有「黃絲」網民反攻劉正做緊冷氣軍師，「Ascar Chan」問：「有咩嘢問題？唔通個個同你一樣做冷氣軍師？」劉正就鬼打鬼話︰「你呢啲盲撐『黃屍狗』梗係覺得無問題啦，暖氣『黃屍狗』，我落現場果（嗰）陣你都唔×知響邊呀，不如鬥SHOW證據睇下邊個落場多D（啲）？」係囉，大家一齊攤晒啲證據出嚟畀人睇咪公道囉，睇下邊個淆底先。
■香港文匯報記者 郭家好