何俊賢和容海恩在fb批評《蘋果》抹黑。 fb截圖「毒果」《蘋果日報》捏造故仔作新聞，已經唔係乜新鮮嘢。政府日前委任新民黨立法會議員容海恩同埋民建聯立法會議員何俊賢為廉政公署事宜投訴委員會成員，就俾「毒果」抹黑成「政府酬庸」，又喺「報道」中捏造事實，老屈容海恩「曾屢次牽涉與選舉相關的醜聞」云云。容海恩日前透過facebook發表嚴正聲明，斥責「毒果」「存心誣衊及中傷」，話會保留所有對《蘋果日報》作出追究嘅法律權利。而何俊賢亦都喺facebook發帖反駁「政府酬庸」一說，強調自己唔單止冇參與今年嘅區議會選舉，該公職亦都冇薪酬，直斥「呢份報紙連做燃料的價值都無，只會散播仇恨。」
抹黑容海恩屢涉選舉「醜聞」
特區政府日前宣佈，行政長官委任4名廉政公署諮詢委員會及廉政公署事宜投訴委員會成員，當中包括容海恩及何俊賢，職責係監察廉政公署處理公眾針對該署所作不涉及刑事嘅投訴，檢討廉政公署可能都會引起投訴嘅程序及措施，同埋喺有需要時提出建議。「毒果」之後就刊登以「政府酬庸 何俊賢容海恩入廉署委員會」為題嘅「報道」，將特區政府向建制派議員委任公職抹黑成「政治酬庸」，更喺報道內文抹黑容海恩曾屢次牽涉與選舉相關嘅所謂「醜聞」云云。
容海恩日前喺facebook發表聲明一一反駁相關「報道」內容，話「毒果」單憑容海恩擔任義務法律顧問嘅團體有成員涉嫌種票，就定下結論宣稱其亦牽涉涉嫌種票案件之中，「此等內容純屬抹黑誣衊，與事實不符。」
佢又話，「有關報道中指於2016年選舉中同鄉會的武術教練以每個人頭500元和一盒月餅作報酬更是《蘋果日報》自說自話，毫無證據」，認為該「報道」係「存心誣衊及中傷」，而該「報道」嘅標題亦都係完全矮化其個人及其法律專業嘅聲譽。佢鄭重聲明自己「未曾牽涉報導（道）所指的選舉事件當中」，更表示，會保留所有對《蘋果日報》作出追究嘅法律權利。
何俊賢斥《蘋果》無燃料價值
何俊賢日前亦就報道喺facebook發帖文指，「其實政治酬庸乜野（嘢）呢？我又無參與區會選舉，這公職又無錢」，揶揄道「我又唔係林卓廷，次次都話自己做過廉署抽水。」佢表示，自己擔任此職，需要用私人時間處理個案，甚至要閱讀大量文件，更要支付交通費，佢斥責「呢份報紙（蘋果日報）連做燃料的價值都無，只會散播仇恨。」
「毒果」對建制派議員嘅無端抹黑亦都令不少網民憤憤不平。網民「Suet Yin Chan」就批評：「毒果日報沒有記者，只有作者。」「Angus Huang」話「佢哋已經係肆無忌憚地作新聞，每天就搵一啲資訊出來去老屈去增加社會仇恨，無資訊就話有人報料」，更感嘆「我唔明點解香港教育咁普及都仲咁多人信毒果！」「Hui YU」就直指，「為民做實事的為『庸』？難道打砸民生的是『才』？這種顛倒黑白的邏輯怎麼可以出報刊？寫出這種文章的人怎麼對得起『記者』這個職業的良心？」
■香港文匯報記者 黃書蘭