■圖中可見，「雞批」盤腿坐在地上，有警員跟她溝通。 網上圖片激進示威衝擊現場咁危險，一般人都會避之則吉，但有啲人就係會興致勃勃咁參與呢啲大龍鳳。成日喺衝擊現場出現嘅失明律師「雞批」，繼早前被報道話「俾港鐵職員推跌」，事後港鐵回應話睇完CCTV，根本冇職員掂過佢後，前日又有人話佢喺上水「和你shop」時「俾警察推跌」喎，再附張佢坐喺地下嘅相就當做「證據」，真係唔知呢個「證據」點樣睇到警察推佢嘞。
??家嘅香港，最經常出現嘅就係看圖作文。前日開始，網上就瘋傳一張失明律師「雞批」盤腿坐喺地下嘅相，隔籬有個警察低頭同佢溝通緊，咁樣嘅一張相，竟然就俾人講成警察「又推盲人」，甚至話警察「推跌盲人」，《蘋果日報》仲話警察「踢失明女律師」??。
嫌背囊重放低坐落地
咁事實係點呢？睇返《蘋果》個訪問片段，「雞批」承認一開始自己喺警方防線前坐喺地下，之後又起返身，後來警方擴大封鎖線，佢就話「俾警察推」，「我叫警察你唔好再推我，跟住佢話『我冇推你』」。「雞批」續聲稱，「個警察繼續推佢」，「我向後行，咁我又揹住咁重嘅背囊，咁我咪擺咗啲嘢喺地下，坐咗喺地下囉。」「雞批」然後話︰「我覺得吓、我唔知，我覺得有個女警企圖用佢嘅腳踭撞咗我一吓（下）。」之後班警察就冇理過佢嘞。
換言之，由頭到尾「雞批」坐喺地下，都係佢自己嘅動作，屬於賴死唔走，而唔係警察推跌，但啲人依然看圖作文，《蘋果》篇文字報道仲將件事寫成「雞批」「被撞跌在地」、「再被一名女警用腳踭踢向其身體」，真係完全唔使理個受訪者講咩，做法令人震驚。
被推跌放流料有前科
事實上，「『雞批』被推跌」呢件事唔係第一次發生，喺今年11月10日，港鐵沙田站因為俾黑衣魔破壞而要關站時，都曾經有「報道」話「雞批」被港鐵職員「推跌」，而港鐵職員見「雞批」瞓喺地上依然落閘咁話。港鐵之後回應事件，話睇咗CCTV，職員根本冇掂到佢，反而係「雞批」自己坐喺客務中心對開地上，之後又坐喺車站外附近地上，到落閘時「雞批」突然想爬入車站，職員就即時停止落閘，畀佢入埋車站同佢解釋完，再升返個閘畀佢自己離開。結果港鐵澄清完，大家咪當冇咗件事囉。
■香港文匯報記者 甘瑜