■王梓軒完成前晚慈善晚宴演出後，便開始放假。香港文匯報訊 一連8場的音樂舞台劇《利瑪竇》part 2，日前在一片掌聲下圓滿結束，曲終人未散，男主角王梓軒將會與中樂團開音樂會。
已有大半年未有放假的梓軒，完成十周年個唱及《利瑪竇》後，終於可以鬆一鬆，放十日大假，梓軒搞笑話：「我請埋同事一齊去日本，咁就唔會有藉口要做嘢，可以真真正正休息吓。」
大半年沒放大假，梓軒說：「昨（前）晚深夜時，收到一個訊息，你唔可以話係警告，但令到我要格外小心，就係我嘅經理人打畀我，因為我自己開咗個無條件任大家去plan嘅假期，竟然我嘅經理人話『你咁嘅budget，我哋點玩得盡興呀！』嗰吓覺得好冤枉，你幫我慳錢係好，但係你想玩多啲咪加碼囉！我哋希望大家玩得好開心，我覺得係值得，因為呢幾個月，每一個同事都係出心出力，甚至有一個同事成個禮拜冇沖涼，另一個直頭攞咗演唱會個道具當床褥瞓喺公司，呢啲咪抵錫囉！」
體重跌至新低
近半年來，梓軒為了個唱及《利瑪竇》音樂劇，忙得不可開交，體重跌到前所未有的145磅，梓軒話：「其實我已經食好多嘢，可能身體慣咗消脂，食極都係咁。」
《利瑪竇》尾場時，台前幕後都難捨難分，一身輕鬆的梓軒話：「我既唔捨得又一身鬆晒，《利瑪竇》由第一次嘅綵排及公演到第二次重演，差唔多有一年，中間亦都花咗半年時間喺台上台下準備同演繹。其間同松哥、導演及台前幕後有好多嘅故事同感情，每次演出都竭盡所能，亦見到觀眾感受到嗰份正能量同愛，我哋自己都不禁流淚，有好幾場一唱序幕，全場起晒身拍手，嗰一種共鳴感令我好感動。」